Matag ikatulong Dominggo sa Enero, mapuno ang mga dalan sa dakbayan sa Sugbo sa nagkalain-laing mga tawo. Kini tungod sa Sinulog Festival, ang labing bonggang festival sa tibuok nasod.

Ang nakalingaw aning Sinulog kay matag tuig na lang kontrobersiyal. Ambot kaha unsay naghuwat rong tuiga. Nakadungog na ba mo sa 2018 Remix sa Sinulog Festival theme song, mga Bisaya?

Karon atong tukion ang nagkalain-laing mga mamahimong buhaton matag adlaw sa Sinulog. Ang mga kaila nakong Bisaya ang nag-suggest ining mga butanga. Kon naka-relate mo, ingna unya inyong mga kaila aron daghan tang malingaw!

1. Motan-aw sa Parade

Siyempre, kon unang higayon nimo mag-Sinulog, ang unang gusto nimong buhaton mao ang pagtan-aw sa parade. Gawas sa mga sayaw, daghang mga float. Unya usahay sakay niini mga paborito natong artista. Kon eleksiyon, mga politiko nga pabibo. Unya, sa paglabay sa panahon, mapul-an. Init baya sad ning motan-aw ka sa mga nanayaw sa dalan. Kuyaw pa gyod sa stampede ug dali lang mawala kon dili magbantay.

 

2. Magtambay sa Abellana

Sa dihang bata pa ko, mag-atang gyod ko ana sa among TV alang sa live coverage sa Sinulog Festival matag tuig. Unya motan-aw gyod na sa mga manayaw sa Cebu City Sports Complex (mas nailhan sa tawag nga Abellana kay tupad niini ang Abellana National High School) diin karon ang mga modaog na lang akong tan-awn sa Youtube. Matag tuig, daghan man gihapon ang mopalit og ticket nya maglingkod ra tibuok adlaw motan-aw aning nagkalain-laing pundok nga mosayaw halad kang Sto. Niño.

 

3. Mosimba sa Basilica

Kon ikaw Katoliko, mas nindot gyod nga dili malimtan unsay diwa sa Sinulog. Mao kini ang piyesta ni Sr. Sto. Niño, ang balaang bata nga mao si Jesus. Kon wala Siya, walay giselbrar nga Sinulog matag tuig, mga Bisaya. Ang nakapait lang kay sakripisyo ang pagsimba sa Basilica. Sa pagsulod pa lang, maghuot na ang bagang duot sa katawhan. Maglisod kag ginhawa sa sulod ug daw makaginhawa na kag tarong inig gawas nimo.

 

4. Motan-aw og Fireworks

Ilabi na sa mga bata ug mga may kasingkasing nga iya sa bata, ang firework matag Sinulog nahimo nang usa ka lingaw nga talan-awon. Sa nagkadaiyang mall ug sa Cebu City Sports Complex mismo may tinuig nga pagpasundayag sa fireworks. Kuyog ang tibuok barkada o pamilya ba kaha, nindot motan-aw sa paghayag sa ngitngit nga kagabhion. Karong tuiga, duna pa ba kaha? Basta wala na sa Basilica ug serado ang Ayala rong panahona.

 

5. Mangita og Gwapo/a

Ug dili kalikayan ang maanindot nga mga talan-awon matag Sinulog. Ilabi na nga magbaha ang mga maanyag ug ambongan nga mga dagway. Mga foreigner ug local nga mga turista ug bisan ang mga Bisaya mismo nga mogawas lang matag Sinulog. Labihan kanindot maglakaw-lakaw sa dalan kon makasugat og makapakulba sa kasingkasing, uy! Kurog ang heart gamay.

6. Makig-jam sa Parties

Kon kontrobersiyal na gani ang hisgotan, wala na tingali pa mas hugyaw aning i-deny ang mga permit sa pagpahigayon og mga party sa dakbayan sa Sugbo. Masabtan man sad hinuon tungod kay dili gyod kini ang related sa pagpahigayon sa relihiyoso nga Sinulog. Apan tungod lagi kay dunay daghang mga batan-on nga mahiligon ani, siyempre, dili gyod na mapugngan ang pagpahigayon! So, asa nga party imong adtoan, bai? Tip: morag namalhin sa Mandaue ang mga party kay gipang-deny ilang permit sa kugihang mayor nga pro-millennial pero anti-party.

 

7. Mag-warak with Friends

Alang sa daghang mga batan-on, boring ang party nga walay tagay. Ug matag selebrasyon, dili gyod na malimtan ang gibathalang botelya. Mao nang matag Sinulog naa gyod nay matumba bisan buntag pa. Ambot lang kaha unsa kaistrikto ang seguridad rong tuiga, mga bai. Dakong purohan nga mogamay na lang apan mahurot kahag badlong sa mga polis nga dagko na kaayog sweldo ning mga kabuang sa mga batan-on rong tuiga?

 

8. Mokatkat og Bukid

Ganahan ka mopalayo sa gubot? Pwede kaayo na sa adlaw mismo sa Sinulog. Pwede kang mokatkat og bukid niining adlawa. Kon gusto nimong mag-inusara, sakay lang og motor paingon asa mang bukira nga pwede kang mag-daytrek. Aron mas bibo, pamitad og mga higala nga samokan usab sa katawhan karong Sinulog. Di ba lingaw na ang inyong laag?

 

9. Molaag sa Beach

Ug kon dili ka ganahan og bukid, hala, laag sa beach! Pakighamag sa bawod didto sa baybayon. Kon naa na ka sa dagat, bugtong ang bawod lamang ang imong madunggan ug siguradong maka-relax kini sa imong labad nga alimpatakan. Unya inig balik nimo sa siyudad balik na sad sa pang-adlawng-adlawng buhatonon.

 

10. Magpuyo sa Balay

Ug kon walay kwarta unya dili ganahan magsuroy-suroy rong Sinulog, papuyo sa inyong balay. Tambay. Relax. Chill. Tan-aw ba kag salida. Basa og libro. Pwede sad kang matulog. Magpa-aircon. Mag-atubang sa elektrikpan. Basta pahuway dira. Usa ka adlaw ra ning Sinulog. Inig katulog nila kay nahubog na, ikaw nagmata na. Payter!

 

Bonus: Magtrabaho sa Sinulog

Kon wala sa mga pilianan, dakong purohan nga busy ka aning adlawa. Wala kay pwedeng mabuhat kondili magtrabaho. Kinahanglan nimong manginabuhi alang sa imong pamilya, sa imong kaugalingon. Bilib ko nimo kay samtang naglulighayaw ang uban, ikaw dinha naningkamot nga makakita og kwarta. Inig human sa tanang singot nga moagas tungod sa kainit sa dakbayan, makapahiyom ka kay usa ka sa mga nitabang nga mahitabo ang laing hugna sa Sinulog nga handomon sa katawhan.

Sa tuig tuig na usab, mga Bisaya!

 

(Mga hulagway kuha ni Wellbein Borja sa Cebu Tech Guide, usa ka Cebu-based blog bahin sa teknolohiya. Daghang salamat! )