Kining mga senior high student karon ba, daghan gyod kaha ni silag potential?
Nagsugod gyod ning isyuha sa University of San Carlos (USC) nga Intramurals. Sama sa ubang eskuylahan, matag Intrams duna gyod mga bashing ug magkatawa na lang tanan inig ka human. Ang nahitabo sa USC kay usa sa mga kabuang aning senior high students nila nag-ingon nga mas duna kuno silay potential tungod kay naa silay duha ka tuig nga pag-eskuyla sa high school usa pa ma-college.
Kalingaw! Kinsa bay magdahom nga kining ilang lalis moabot ang kabibo sa tibuok Pilipinas? Sa una dinhi lang ni sa Cebu ug nagkatawa pa gani tong mga taga-USC sa sinugdanan nganong mag-apil-apil ang mga walay labot sa ilang Intrams.
Apan unsa bay ilang mahimo nga misalamin man usab kining ilang giingon nga mas dunay potential ang mga senior high students sa tibuok Pilipinas? Kahinumdoman nga bag-o lang giimplementar ang senior high school sa tibuok nasod aron kuno mamahimo nang manrabaho ang pipila ka mga estudyante nga dili na kinahanglan motungha sa kolehiyo.
Dili ba nga sa pagkakaron daghang mga trabahoan ang nag-require nga at least college level? Sugod sunod tuig mamahimo na unyang manrabaho ning mga senior high graduates nga dili na kinahanglan mag-college.
Karon, ang pangutana: unsa kahay mamahimong trabahoan aning mga senior high students sa atong nasod? Pipila kaha nila ang mopadayon gihapon sa college tungod kay walay klarong trabaho ang gitagana nila?
Dili ikalimod nga dunay mga trabahoan nga gusto og wala nakahuman og college aron dili dako ilang sweldo. Dunay mga nang-abuso sa kabaskog ug kapabilidad sa mga wala nakahuman og college ug gihatagan lamang og minimum nga sweldo. Ang pipila ubos pa man gani sa minimum. Mga walay kaikog!
Tinuod, unsay naa sa mga senior high students ug unsa kahay ilang nakat-onan nga wala mahibaw-i sa mga estudyante sauna nga wala miagi dinhi?
Sa kasamtangan, daghan pang issue nga angay atubangon ang senior high program sa nasod. Lami kaayo ang mga subject nga gipangmugna apan walay mga magtutudlo nga may katakos motudlo ug mopaambit og kahibalo ngadto sa mga estudyante.
Tinuod, dunay potential ang mga senior high students apan maglisod gyod sila kon ilang kontra mga nagtungha na sa kolehiyo. Sa kataposan magkatawa lang tanang tanan kay kon dili ta makat-on og himo og kaugalingong panginabuhian, mga ulipon lang gihapon sa mga dagkong tae sa katilingban.
