Ug dili na gyod kapugngan… moabot na gyod ang panahon diin mag-uwan ang kwarta (ug mabuang sad ta og pangita og kwarta unsay atong ipauwan karong panahona) ilabi na sa mga bata. Andam na ba mo sa umaabot nga Pasko, mga Bisaya?

Ang Pasko alang sa mga Bisaya usa sa mga most awaited nga event sa tibuok tuig. Tungod niini, aron mahibaw-an unsa gyod diay ang Pasko nga Binisaya, nangutana ko sa akong mga higalang blogger kon unsa ang Pasko nga Binisaya alang nila, ug mao ni ilang mga tubag:

 

Basta Paskong Binisaya…

“…busy kaayo ang kusina kay daghang putahe ang giandam para sa Noche Buena. Inig bagting sa alas dose, lumbaanay dayon sa la mesa. Ang mga sobra sa gabii, aw, tiwason inig ka buntag! Solved na ang kaon! Pero most of the time, naa ra ko sa kwarto matulog ug mobangon lang kay motan-aw sa fireworks. Hahaha!” – Channel Marie

“…pangandaman gyod na, kay mao nay higayon nga magkahiusa mo sa tibuok pamilya o sa imong mga mahal sa kinabuhi. Bongga ang preparation, daghan pagkaon, ug daghang bag-o ug mga regalo. ” – Arnold of Wandering Soul Scamper

“… before mag alas dose, maglibot sa balay kay ipasiga ang kato (morag star-star siya inig mokayo ambot unsay tawag ana kalimot ko basta ‘pasirit’ na sa amoa). Inig human kay mokaon na dayon bisan ginagmay unya magtabi hangtod mabuntag.” – Lai of thelittlelai: beyond limits

“…kaon hangtod Sinulog!” – Jullian of Utterly Random Techie (Kuyaw sad ni da, matagbaw man ta og dug-ab aning kalakiha!)

“…momata og sayo aron mosimba unya mamainit og puto ug sikwate.” – Carlo of Kalami Cebu

“…Kaon Ginagmay…Daghang Tagay!” – Jomar of Laagan Ko!

“…walay kahumanang kaon, tagay, katawa, ug paghinigugmaay sa pamilya pero wala gihapon si forever.” – John of Four-Eyed Laagan (Hasta kani, hugot na sad?!)

“…magpatagad sa mga Ninong ug Ninang aron mahatagan og grasya.” – Rady of radysetgo

“…di mawala ang mga lingin na mga prutas hangtod ang nawong sa nikaon malingin pod.” – Marica of The Other Dimension of Reality (Andam na ta sa Bag-ong Tuig ani, da! Hihi.)

“…naay daghang bag-o: bag-ong sanina, bag-ong cellphone, ug uban pang butang. Bag-ong uyab o bag-ong haircut o bag-ong hairdo in preparation para sa Bag-ong Tuig.” – Rea of Blissful Snapshots

“…magsige ra og pabuto, sa gawas o sa sulod.” – Totem of Totem Engineer (Hmmmm… kuyaw ning pabuto da. Basin matokhang ta aning kalakiha!)

 

Pasko sa mga Bisaya = Kaon, Tabi, Tagay

Samtang nagbasa sa ilang mga butang, gigutom na sad ko da. Unsaon man sad ning Pasko sa mga Bisaya sige man lang og kaon. Kon dili kaon, hala magkalingaw og party unya kaon na sad inig human.

Daghan na gyod bitaw ang mga senyales nga Pasko na. Pero ready na ba ka? Tan-awa ning mga signs nga most probably dili ka ready sa umaabot nga Pasko.

Ug dili sad gyod mawala ang mga regalo sa Pasko. Mao gyod ni ang panahon nga mahurot atong kwarta palit og mga regalo unya at the same time daghan sad tang madawat (which is not always true if magkatiguwang na ka kay the older you get, the lesser gifts you receive man tingali tungod kuno kay ang Pasko alang sa mga bata).

 

Regalo Karong Pasko

Ikaw, unsay regalo nga gusto nimong madawat karong Pasko? Wala ta kahibawo, mobasa diay dinhi sa Santa Claus ug i-grant niya imong wish.