Nausab ang dagway sa mga salida sa MMFF karong tuig tungod sa dakong gubot sa miaging tuig. Ug miingon ko sa akong kaugalingon nga motan-aw kog mga salida sa MMFF 2016 karong tuiga bahalag mabuslot akong bolsa.

Sa pagsuwat niini, nahuman na kog tan-aw sa Sunday Beauty Queen, Vince and Kath and James, Seklusyon, ug Ang Babae sa Septic Tank 2. Paningkamotan nako nga makatan-aw usab sa Die Beautiful, Saving Sally, Oro ug Kabisera usa kini mawala sa mga sinehan sunod semana.

Kon inyong nahinumdoman, nagsuwat ko unsaon pagtan-aw og mga salida sa MMFF sa Cebu kay duna baya toy chance unta nga dili kini mapasalida dinhi sa probinsya. Kani man gong MMFF gi-require lamang sa Metro Manila ug ang mga hakog nga mainstream movies nga wala maapil sa line-up sa MMFF, nagpadayon gihapon og show sa ilang mga salida nga para kuno sa mga bata. (Giatay, para sa bata o para sa ilang bolsa?)

 

Mga Sinehan sa Sugbo

Sa Sugbo, nalipay ko kay showing ang mga MMFF movies sa tanang sinehan sa Sugbo. Dunay salida sa SM Seaside, SM Consolacion ug SM City Cebu (P235), Ayala Center Cebu (P180), Cine Oriente (P165) ug Gaisano Country Mall (P150). Tan-awa lang ang schedule unsay showing niining maong mga sinehan.

Nakapait lang kay daghan gihapong mga sinehan ang dili mopasalida sa tanan. Ingnon ta nga gamay lamang ang mga ilang mga sinehan pero nganong duna pa man silay lugar alang sa Enteng Kabisote, Mano Po, ug Super Parental Guardians? Nindot unta to ba nga sama sa miaging mga tuig, ang mga salida sa MMFF ang atong ipasalida ug suportahan.

Ingon sila gamay lang kuno ang mga nitan-aw apan nganong naglinya man ko sa Ayala Center Cebu niadtong nitan-aw kog Seklusyon? Makapahimuot nga daghan ang nanan-aw niining mga salidaha ug sukwahi sa nangaging mga tuig, sagad sa mga batan-on nga hilig og foreign movies ang na-convince nga motan-aw og quality Filipino films!

 

#MMFF2016 sa Cebu

Ganahan ko sa Cebu ug sa akong online nga mga higala! Sa tibuok semana, samtang nagtan-aw sa mga salida, active sad ko sa akong social media.

Kaniadtong Disyembre 26, pag-abot nako gikan sa probinsya, milahos dayon ko sa Cine Oriente Cebu. Akong gitan-aw ang duha ka showing nga MMFF movie sa ilang duha sa sinehan: Sunday Beauty Queen ug Vince and Kath and James.

Porbida, bug-at kaayo sa dughan ang Sunday Beauty Queen. Bilib ko niining documentary nga for the first time naapil sa Metro Manila Film Festival. Worth it kaayo pang-Best Picture!

Sa sunod nga adlaw, mitan-aw kog Seklusyon. Porbida, hastang lamia! Horror nga medyo dili horror apan historical (or sort of). Nindot ang iyang atake ug bilib ko sa cinematography. Hangtod karon, duna lang gihapon koy mga higala nga kauban nako og hisgot aning salidaha.

Sa duha ka adlaw nagsige lang kog estambay sa sinehan murag adunahan. Pero pasagdii lang, karon lang ni. Makalipay lang hunahunaon nga for the first time ang MMFF napuno sa mga quality films!

Ug sa miaging gabii mitan-aw kog Ang Babae sa Septic Tank 2 ni Eugene. Lingaw nga salida ug magsige kag katawa sa iyang mga atake. Ganahan ko sa iyang overall theme nga pwede kaayo pang-cover movie ron sa MMFF 2016 sanglit mao man kini ang ilang gibuhat. Nag-invest sila sa mga indie films nga quality ug gilabay ang mga walay lami nga mainstream. Pero naa sad baya mga mainstream nga nindot parehas sa Die Beautiful ug Vince and Kath and James.

Ug mao ni hinungdan nganong nitan-aw kog #MMFF2016 films karong tuiga, mga higala:

 

MMFF 2016 Winners

Ug sa Awards Night niadtong Disyembre 29, makaingon gyod ko nga deserving ang Seklusyon sa iyang awards ug ang Sunday Beauty Queen. Nindot unta nga mas daghan pa ang motan-aw niining mga salidaha!

Ug mao kini ang mga nakadaog:

  • Best Picture: Sunday Beauty Queen
  • Gatpuno Antonio J. Villegas Cultural Award: Sunday Beauty Queen
  • Fernando Poe Jr. Memorial Award: Oro
  • Best Director: Erik Matti, Seklusyon
  • Best Actor in a Leading Role: Paolo Ballesteros, Die Beautiful
  • Best Actress in a Leading Role: Irma Adlawan, Oro
  • Best Ensemble Cast: Oro
  • Special Jury Prize: Rhed Bustamante, Seklusyon
  • Best Screenplay: Seklusyon
  • Best Actor in a Supporting Role: Christian Bables, Die Beautiful
  • Best Actress in a Supporting Role: Phoebe Walker, Seklusyon
  • Best Cinematography: Seklusyon
  • Best Sound Design: Seklusyon
  • Best Theme Song: “Dominus Miserere” Seklusyon
  • Best Editing: Sunday Beauty Queen
  • Best Musical Score: Saving Sally
  • Best Production Design: Seklusyon
  • Best Float: Die Beautiful
  • 42nd MMFF My Most Favorite Film: Die Beautiful
  • Children’s Choice Award: Saving Sally, Sunday Beauty Queen, Vince & Kath & James
  • Male Celebrity of the Night: Ronnie Alonte
  • Female Celebrity of the Night: Rhian Ramos
  • Short Film – Best Screenplay: Mitatang
  • Short Film – Special Jury Prize: Manila Scream
  • Short Film – Best Picture: EJK
  • Short Film – Best Work for Children: Passage of Life
  • Best Short Film Director: Jarell Serencio for Mga Bitoon sa Siyudad

 

Ikaw, higala, unsa nga salida sa #MMFF2016 ang inyong natan-aw? Kon wala, unsa untay gusto nimong tan-awon ug nganong wala ka makatan-aw?