Kool Adventure Camp: Pagkat-on Pinaagi sa Adbentyur

Ning bag-ohay lang, nakadawat kog imbitasyon sa Kool Adventure Camp (KAC) nga motambong sa tulo-ka-adlaw nga Media Camp uban ang mga nagkalain-laing personalidad nga sagad wala pa gyod nako mailhi. Ug tungod niining talagsaong higayon nga gihatag sa RAFI Foundation, Inc. (ang organisasyon nga nagpaluyo sa KAC), mas nailhan nako ang akong kaugalingon.

Tulo ka adlaw ug duha ka gabii mi nga nagpuyo sa Kool Adventure Camp didto sa Balamban. Gikan sa buhatan sa RAFI atbang sa Casa Gorordo sa Cebu, hapit moabot duha ka oras ang biyahe. Sa among pag-abot nagsugod na dayon ang among challenge.

 

Sa Pag-abot sa Kool Adventure Camp

Unang challenge: kinahanglan ming mangita og camp name nga buot namong ingalan sa among kaugalingon. Dinhi sa Kool Adventure Camp, kinahanglan nimong ibilin ang imong ngalan. Bunyagan nimo imong kaugalingon og bag-ong agnay (nickname) nga ibutang sa imong nindot nga ID.

Ug ang akong gipiling ngalan: PANAW. Nagpasabot nga paglakaw, pagbiyahe, pagkamatay. Ang kahulogan sa kinabuhi mao ang pagpadayon ug pagpangitag mga agianan aron moabot sa kataposan nga nagpahiyom.

Ikaw, unsay imong ngalan?

Inig human sa pagbunyag og halandomon nga camp name, magpundok mo sa usa ka tribu. Mangita og nindot nga ngalan ug mga values nga inyong hinumdoman ug panaminan sa tulo ka adlaw ng pag-estar ninyo sa Kool Adventure Camp.

 

Ug Namugna ang Tribu XTRA

Tungod kay 12 na mi kabuok, usa lamang mi ka tribu. Kon mas daghan pa, tingali mas daghan usab. Matag tribu dinhi dili molapas og 20. Among gingalan among tribu og XTRA tungod kay dili gyod malimtan ang letrang X sa pipila namo.

Ug kini ang mga values nga among gibunyag sa among tribu: Xcel, Xpress, Xperience, Xplore, ug Xtra Mile. Dili moatras kon dili pa makasuway sa pagsanong sa hagit sa kinabuhi. Mopadayon hangtod moabot sa kataposan. Mopahiyom ug moabiba sa mga kauban.

 

Mga Rope Course sa Kool Adventure Camp

Usa sa mga daling mahinumdoman sa KAC mao ang rope course. Daghan ug lingaw ang matag usa niini. Apan sukwahi sa ubang adventure places, dinhi gipahimug-atan ang team work. Ang pagsalig sa kauban ug pagtabang sa usag-usa ang tumong niini. Ug inig human sa matag rope course, may debriefing gyod nga mahitabo. Dinhi i-explain ang kahulogan sa gibuhat ug unsay mga nakat-onan.

Lingaw ang magpaduyan-duyan sa hangin nga wala nay gunitan ug nagkupot nimo mao na lamang ang pisi nga gigunitan sa imong kauban. Ug dunay andam mosawo nimo magkinaunsa man. Apan, world-class ang standard sa facilities ug equipments dinhi. Wala pa gyoy namatay ug labihan ka istrikto ang Kool Adventure Camp kon safety na ang hisgotan.

Dinhi lamang ko nakasuway nga molatay sa wire nga 40 ka metros ang gihabogon (height) gikan sa yuta. Magpangurog ka apan malingaw ka na lamang kay mahuman nimo ug maatubang nimo ang imong kahadlok.

Sa among nasuwayan nga rope course, ang labing lingaw ang High Y. Dinhi duha ka tawo ang mokatkat ug aron makahuman, kinahanglan nilang mabalanse ilang kaugalingon ug mosalig sa usag-usa. Sa lima ka pair nga misuway, usa lamang ang nakahuman.

Dili sayon apan dili sad imposible nga mahuman!

 

Sa Among Pagbaktas sa Foressa Trails

Ug sa pagsugod sa ikaduhang adlaw, migawas mi sa Kool Adventure Camp. Miadto sa atbang nga gipanag-iya usab sa Aboitizland, ang Foressa Trails. Among gibaktas ang tulo ka kilometro ug matag usa namo may lain-laing experience sa pagkatkat og bukid. Dunay gisayonan, dunay naglisod, ug daghang singot ang miagas.

Sa pagkahuman daghan ming nakat-onan. Lahi ra gyod diay kon duna kay mga kauban nga hunahunaon. Dili ni lumba ug kinahanglan nga ang tanan makahuman.

Ug sa wala pa mi mibiya sa ikatulong adlaw, nagpahigayon mig gamayng sesyon diin giila namo among mga kaugalingon ug gihatagan og pagtagad ang among mga kauban. Ug kining pipila ka adlaw nga pagpuyo namo sa Kool Adventure Camp nakahatag nakog paglaom nga mopadayon sa kinabuhi.

 

Adto Ta Sa Kool Adventure Camp

Sa akong kasinatian, ang Kool Adventure Camp usa ka bahin sa akong kinabuhi nga mas nakapaila nako sa akong kaugalingon. Wala ko magdahom nga makalatay kog taas nga alambre nga ang nagkupot nako akong mga kauban. Nungka ang pagkupot sa kauban nga naglatay og alambre.

Internationally recognized ang KAC. Miyembro kini sa Association for Experiential Education ug Association for Challenge Course Technology. Ang facility ug equipment nagbase sa international standard. Kini ang nag-inusarang adventure education facility sa tibuok nasod. Naa pa gyod dinhi mahimutang sa Sugbo!

Ang Kool Adventure Camp alang sa mga tinun-an ug propesyonal. Kon ang imong kompaniya nagkinahanglan og usa ka programa alang sa team building, mamahimo kaayo mong mangutana sa KAC aron mahatagan mog unique nga programa depende sa inyong panginahanglan.

Ang Kool Adventure Camp nahimutang sa KM 42, Transcentral Highway, Cansamoroy, Balamban, Cebu. Mamahimo silang matawagan sa 260-9000 loc 1011. Mamahimo usab nga mag-email sa info.kac@rafi.org.ph ug duawon ang ilang Facebook page alang sa dugang kasayoran.

PS – Ang tanang hulagway kuha ug gipanag-iya sa Kool Adventure Camp. Gi-discourage mi nga magkuha og mga hulagway samtang nagpadayon ang programa aron maka-focus mi sa mga kalihokan. Gidili usab ang cellphone ug mipili ko nga mag-Airplane mode sa tibuok higayon nga pagpuyo nako sa KAC.

About Rome Nicolas

Magsusulat sa Binisaya. Garbo iyang pagka-Bisaya. Hilig og kaon. Laagan. Tatak Bisaya. Padayon!

View all posts by Rome Nicolas →

Leave a Reply

Your email address will not be published. Required fields are marked *