Usa sa mga labing batang Bisayang mang-aawit ug kompositor sa atong henerasyon karon si Jerika Teodorico. Sa iyang linghod nga panuigon, ubay-ubay na ang mga kanta niya nga officially na-produced nga madunggan karon sa kahanginan.
Sa mubong higayon nga gikahinabi ko siya, gi-challenge ko siya nga iyang i-rank ang mga nasuwat niyang awit base sa iyang paborito. Ang gikabiliban nako ani niyang bataa kay hait ang iyang suwab sa pagtagik og mga pulong. Ug kon duyogan na sa gitara, makapanlibawot na dayon sa balhibo. Ug
Nakasubay ko sa pagdako ni Jerika Teodorico. Unang nadunggan nako ang iyang ngalan dihang nakadaog siya sa ikaduhang tuig sa Vispop sa tuig 2014. Sa milabayng upat ka tuig, ubay-ubay na ang iyang agi. Gawas sa Vispop, misalmot na sad siya sa Cebu Pop Festival. Mitampo sab siyag awit sa Kadasig ug ning bag-ohay lang gyod, siya usab ang nagsuwat sa bag-ong kanta sa Mandaue Nights.
Mga Binisayang Awit ni Jerika Teodorico
Sa unom niya ka kanta ni Jerika Teodorico nga na-produced na sa pagsuwat niini, mao kini ang lista base sa iyang labing ganahan dihang gipangutana nako siya. Kon duna tingali Ed Sheeran dinhi sa Sugbo, pwede na kaayo nga ihatag kanang titulo kang Jerika Teodorico.
6. Uban
Sa unang higayon, migawas sa anino sa Vispop (diin tulo sa lima ka tuig niini nakasulod ang iyang mga kanta sa finals) ug misalmot si Jerika Teodorico sa Cebu Pop Festival. Ang iyang kanta nga gisalmot giulohan og “Uban” nga gikanta pa gyod sa payter nga Missing Filemon lead nga si Insoy Ninal ug giubanan pa gyod ni Therese Villarante!
Matod pang Jerika, “I super love these songs (including Labyu Langga) too but I can’t help but fee insecure with the fact nga these are songs na lutaw kaayo akong oldies references. From the chords to the accompanying melodies, no doubt minggawas jud ang Beatles, APO, Carpenters, and katong mga American songbook standards na akong trip. I love that kind of music and I’m proud of these songs kay of course they still show my prowess as a songwriter, but mao na siya, little room to experiment kay mahulog og ‘been there, done that’ siya nga sound. But that doesn’t mean wa na koy plano magbuhat og ing-ani nga songs… ganahan lang sa ko mosuway of lain kay abi pa lang wa tay laing nahibaw-an?”
Samtang magkatiguwang ka, mas makapahiyom ka niining maong Bisdak nga awit kon imong mabatian.
5. Kung Di Man Gani Kita
Kahibawo ba mo nga kining kantaha ang midaog isip ikaduhang ganti sa Vispop 5.0? Kini usab ang unang kanta ni Jerika nga dili siya ang mi-interpret sa iyang kaugalingong kanta. Payter kaayo si Davelyn Cuenco dihang iya kining giawit atol sa Final’s Night sa Vispop!
Ug miangkon si Jerika, “Nindot lang jud ending kantaha, which is kinda frustrating kay people seem to miss out on the ending esp on live performances!”
Paminawa ninyo kini ug tan-awon nato kon dili ba mo manglibawot sa matag pulong niini.
4. Labyu Langga
Kini ang unang kanta ni Jerika Teodorico nga atong nadunggan. Ug siguradong inyo na gyod ning nadunggan sa radyo, sa Spotify, sa playlist sa inyong higala human kini nakadaog isip Grand Prize sa Vispop 2.0 kaniadtong 2014.
Usa na tingali kini ang labing sadya ug bibo nga kanta ni Jerika. Paminawa ninyo ang kanta aron makasabot mo nganong nakaingon ko niini.
3. First Kiss
Unang nadunggan nako ang Mandaue Night atol sa ilang guesting sa Vispop 5.0 Final’s Night. Niadtong gabhiona, wala pa ko makaila nila apan duna silay templa nga bugnaw sa dunggan.
Ning bag-ohay lang, nag-launch ang banda og bag-ong awit nga apil sa ilang unang music album nga ato na unyang madunggan sa mosunod nga mga buwan. Kini ang “First Kiss” nga in collaboration ang pag-compose sa banggiitan nga si Jerika Teodorico.
Matod pang Jerika, “First Kiss is a collab to die for, and proud ko ani for so many reasons: finally, I was able to write a song nga modern-sounding, and naa pay pina-millennial whoop sa hook. Of course, without the brilliance of Karl Lucente, di jud to nako mahunahunaan nga mga linya. As I’ve said, it’s a collab to die for, because this is how I imagined collabs would be katong nagsugod pa ko as a songwriter: people sharing ideas in a room, trying out what may be good for the song, dismissing ridiculous stuff, and so on.”
Kon inyo ning madunggan kantaha, siguradong moluag ang inyong dughan.
2. Baklay
Atol sa Vispop 4.0, usa ni sa mga kanta nga dali nakong nakat-onan ang lyrics. Ganahan ko kay isip usa ka laagan, lami sa dunggan ang paglitok sa nagkalain-laing dapit sa isla sa Sugbo dinha sa kanta.
Ug kon ikaw hilig magbaklay-baklay o nagdako dinhi sa Sugbo, dakong purohan nga magpahiyom ka samtang maminaw niining kantaha.
1. Anino
Sa unang higayon nga nadunggan ko ning kantaha, makahunahuna ko nga pila kaha ka gabii ang pagpuwaw alang niining mga linyaha. Matod pa ni Jerika, “Makaingon ko these songs (including Baklay) were carefully crafted, as I remember the process it took to shape each verse and the accompanying melodies.”
Dihang gi-produce kini sa Kadasig, nanghinaot na gyod ko nga moabot ang mga adlaw nga magmugna ni Jerika Teodorico og iyang kaugalingong album. May umaabot ba? Si Jerika mitubag, “Kon makakitag kwarta puhon!”
Kon duna kay kaila nga producer dinha, basin ganahan siya mosuporta aning kalaki sa usa sa mga labing batang mang-aawit sa Sugbo nga garbo natong mga Bisaya!
