Matag tuig, adunay Earth Day nga himoon sa tibuok kalibotan. Gihimo kini aron mas daghan ang makahibawo unsaon paghigugma sa atong inahan nga kalikopan. Karong tuig 2017, nataymingan nga nakahibawo ko bahin sa #ILuvCebuInstameet 4.0: Love our Seas nga gipasiugdahan sa #ILuvCebu ni Doyzkie Buenaviaje. Ug, giatol sa Earth Day kining maong kalihokan. Karong higayona, gipahigayon kini sa 5-star hotel and resort dinhi sa Sugbo: ang Shangri-La Mactan!

Sa akong pag-apil sa #ILuvCebuInstameet, akong gibitad ang akong mga higala sa HIBsters (usa ka pundok sa mga blogger nga nagkabuang og suwat karong tuiga) aron mas bibo, mas lingaw ang kalihokan. Isip mga miyembro sa usa ka blogging organization sa Sugbo, nakaila na nako sila daan ug atol sa tibuok kalihokan, labihan namo ka sadya samtang nagbuhat sa mga activity.

Sa unang talk ni Christine Paula Love Bernasor, Miss Scuba International 1st Runner-up, iyang gihisgotan mao ang bahin sa Marine Conservation ug ang Plastic Pollution. Nakat-onan nako gikan sa iyang pamulong nga dili na ta magpataka og gamit og plastic kon dili kinahanglan kay dako ang epekto niini sa atong kalikopan. Tungod kay nalingaw kog participate sa iyang discussion, nakadaog kog reusable straw nga mamahimo kaayo nakong magamit matag karon ug unya.

Ang ikaduhang talk mao ang The Importance of Corals sa Marine Ecosystem gikan sa Shangri-La’s Marine Biologist nga si Irene Tan. Dinhi nako nahibaw-an unsay gamit sa coral ug nga dali lamang silang mamatay ilabi na kon makahimamat og tawo. Dinhi usab namo nahibaw-an nga ang Shangri-La sa tibuok kalibotan dunay enrivonmental movement diin mag-preserve sila og usa ka klase sa endangered nga hayop o dili ba tanom. Sa Shangri-La Mactan, ang ilaha mao ang sea horse. Apan gikasubo nila nga sa milabayng napulo ka tuig, wala na sila makakita niini. Apan padayon gihapon ang ilang paningkamot aron sa umaabot nga mga tuig mobalik kining sea horse sa dagat sa resort.

Ang Team Sea Star nag-briefing bahin sa Coral Planting nga activity. (Hulagway gikan sa Shangri-La Mactan)

Human sa mubong discussion nga nagpamata namo sa unsay tinuod nga kahimtang sa kalikopan karon, dunay duha ka activities nga gihimo aron malingaw mi. Una ang pagtanom og artificial corals ug ang ikaduha mao ang paghimo og balay sa isda gikan sa semento nga maoy butangan sa mga buhing coral unya.

Labihan namong lingawa ug labihan sad kainit sa Shangri-La Mactan dihang among gibuhat kining mga buhatonon. Natagbaw ang tanan og picture-picture ilabi na nga ang tanan dunay nindot kaayo nga mga selpon aron kuhaan og handomanan ang mga panghitabo.

Pwede diay #iluvcebuinstameet unya walang lamian nga pagkaon? Hala, lamon na sa #shangrilamactan! ???

A post shared by Rome Nicolas (@bisayafoodie) on

Sa among pagbalik sa discussion room, gisugat mi og pagkaon gikan sa Shangri-La Mactan diin kaming tanan nagsadya og pamunit sa mga nagkalain-laing matang sa cake ug uban pang dessert unya giparesan ug bugnaw nga juice ug softdrinks aron makapawala sa kauhaw.

Ang tanan nagpahulagway isip handomanan sa #ILuvCebuInstameet 4.0: Love Our Seas nga labihang lingawa! (Hulagway gikan sa Shangri-La Mactan)

Sa among pagpauli, bawon namo ang mga kahibawo unsaon pagpangga si Mother Earth ug isip mga Earth Warriors, amo kining isabwag ngadto sa uban pang mga tawo aron mas daghan na tang mopangga sa atong kalibotan.