Sa panahon karon, duha ra ang ilado nga klase sa blogger. Una, kining mga blogger nga lami kaayo og pose unya mga gwapo ug gwapa. Maglaag-laag sila unya magsige og pa-picture bisan asa pa sila maabot. Ikaduha, kining mga blogger nga mga pataka og post og balita bisan karaan dayon ingnon nga bag-o. Dako ni silag traffic sa ilang mga blog pero kasagaran walay kwenta ilang mga gipangsuwat.

Ang una gitawag nga Fashion and Style Blogger. Ang ikaduha wala ko kahibawo unsay tawag basta nanggawas ni sila bag-ohay lang aron ilaron ang mga tawo nga tapolan mobasa ug mokaykay og mga impormasyon. Dayon kusog kaayo magyawyaw pataka lang og paghot. Sakit sa bangs.

Fashion and Style Blogger

Wala koy charisma ug dili ko gwapo nga makailad og dili ingon nato. Magsige ko og kaon usahay ug kini hinungdan nganong kinahanglan na kong magpadaot. Wala ko kahibawo asa na nabutang ang akong abs. Dili sad ko kahibawo mo-posing. Mag-traning pa ko morag moapil og beauty pageant. Ambot lang kaha kanus-a.

Daghan kong kaila nga mga Fashion and Style Blogger. Ang paborito nako si David Guison ug usahay dunay mga higayon mangutana ko sa akong kaugalingon nganong wala na lang ko nahimong siya. Mag-posing-posing ra ko, maglaag-laag ko, bayran ko. Sa kataposan sa adlaw, nakahunahuna ko nga dili sayon ang ilang trabaho. Hago kini ug daghang kuti nga giagan apan wala lang nato makita. Pila kaha ka pose ang nabuhat usa siya maka-finalize nga mao na to ang i-post? Pila kaha ka gabii silang magpuwaw aron magsuwat sa ilang mga blog?

Sa pagka karon, wala nako magdahom nga mahimong si David. Gusto lang nakong mahimong usa ka Bisaya nga blogger nga proud sa iyang pagka-Bisaya.

 

Pataka’g Yawyaw Blogger

Tungod aning mga blogger kunohay nga mitumaw bag-ohay lang, daghan na ang nag-ingon nga mga walay buot ang mga blogger. Pataka ra kuno og tabi. Blog-blog lang aron mangilad. Basta website gani ang source unya dili news organization, tawgon dayon og blog. Unya, kinahanglan pa nakong isulti unsay mga gihunahuna sa publiko nga wala makasabot unsay blogger?

Aron dili maapil aning isyu, likayan na lang nga mahimong usa ka political blogger. Daghang kwarta ani rong panahona pero kon masipyat, posible sad nga makadaog ka og free trip paingon sa menteryo.

 

Bisaya Blogger

Dili kinahanglan lami ang pose ug gwapo aron mahimong usa ka Bisaya Blogger. Dili kinahanglan nga magpataka og yawyaw ug mag-apil-apil sa kasamok sa politika aron mahimong usa ka successful nga blogger. Layoan ang kontrobersyal nga isyu, mopaduol sa mga sugilanon sa kinabuhi sa mga Bisaya.

Mamahimo kahang ilado nga blogger ang usa ka Bisaya nga dili gwapo ug dili mag-apil-apil sa politika sa iyang blog? Kanang popularity, shallow ra na. Ang tinuod nga success sa usa ka blogger nag-agad kon pila sa iyang mga gisuwat ang nakapausab sa dagan sa kinabuhi sa iyang mga magbabasa. Mao na ang importante.

Sa pagka karon, nagpadayon kog plano unsay mga sugilanon sa mga Bisaya ang takos hatagan og pagtagad dinhi sa Basta Bisaya. Usa kini ka sa blog sa kinabuhi sa mga Bisaya, ilabi na natad sa Arts & Culture.

Hangtod sa sunod nga yawyaw, Bisaya.

PS
Sa imong tan-aw, duna kahay future ang pag-Binisaya ug ang Bisaya nga blog?