Kon inyong nabantayan ang mga Bisaya jokes, makaingon ka nga sagad niini matawag nga corny. Dali lang sabton, mabaw lamang ang unod kon hunahunaon. May uban usab nga bastos ang kahulogan ug kon buot hunahunaon dili gyod baya kataw-anan.

Nganong ingon ani man?

Sa tinuoray lang, makapangot sad kog akong tampihak aning kalakiha. Wala pa ko maabot aning kalibotana, ingon ani na ang mga Bisaya. Gani kahinumdoman man nga ang mga Bisaya dali ra gyod nga mokatawa ilabi na kon ang mga joke dili na kinahanglan nga maghunahuna. Sa akong tan-aw, ganahan ang mga Bisaya nga dali lang masabtan.

Unya, kahibawo man kaha mo unsay Binisaya sa joke? Kon wala pa, angay mong mahibawo nga PASIAW ang tubag niana, mga Bisaya.

Sampol nga Bisaya Jokes

Ania ang tulo ka Bisaya nga joke nga akong nakaykayan sa internet ug kapila na intawon mabalik-balik sa atong Bisdak nga katilingban:

Nag-field trip si Pedro…
Magtutudlo: (gitudlo ang deer sa zoo) Juan, unsa man na nga animal?
Pedro: Wala ko kabalo, mam.
Magtutudlo: Unsay tawag sa imong Tatay sa imong Nanay?
Pedro: TARANTADO di ay tawag ana, Ma’am?

***

Lalaki: Unsay pangalan nimo?
Juan: Juan Kampupot, Sir.
Lalaki: Edad?
Juan: Diseotso, Sir.
Lalaki: Unsay trabaho?
Juan: Traysikol driver, sir.
Lalaki: Single?
Juan: Naay sidecar, Sir.

***

Duha ka asawa namalit og itlog sa merkado…
Misis 1:You know mare, whenever I see an itlog na pula makahinumdom ko sa akong mister.
Misis 2: Ngano? Ingon ana ka pula?
Misis 1: Dili! Ingon ana ka parat!

Sigurado kong dili kini ang unang higayon nga nakadungog mo aning mga pasiaw. Bahaw na kaayo ni ug sa gikaingon ko na: (1) dali lamang kining masabtan, (2) medyo dili kataw-anan, ug (3) dunay sagol binastos. Ingon gyod tingali ang mga joke nga kataw-anan sa masang Bisaya.

Bisaya Jokes sa Twitter

Dili sa tanang higayon lawom ang mga pasiaw nga madunggan. Dili kay basta Bisaya na gani, corny daw. Duna sad bayay mga brayt nga pasiaw nga magkatawa lang ta samtang naminaw o nagbasa.

Sa panahon sa social media, nagkadaghan ang mga lingaw nga joke nga wala nisunod sa format sa mga binuang nga Bisayang joke apan mas lingaw pa gani basahon.

Pananglitan basaha kining duha ka tweet:

Di ba? Lahi kinig porma sa nahisgotan na nato apan kataw-anan gihapon basahon.

Duha lamang ni sila sa mga kataw-anan sa Twitter nga dili kinahanglan magpakaaron-ingnon. Mga ordinaryong tawo lamang sila nga nagbaton og lantip nga pangutok.

Asa Padulong Ang Bisaya Jokes?

Kon corny ang sagad sa mga Bisaya joke nga inyong nadunggan, kinahanglan pa mong maniid sa palibot. Nabag-o na ang panahon tungod sa social media. Duna gihapoy tatak Bisaya ang atong mga pasiaw apan dili sa tanang higayon mabaw, walay unod ug binastos.

Makasabot ra man sad ko nganong usahay magbinastos ang mga joke nga Binisaya apan kon sa tanang higayon puros na lang pamalikas, unsa man kahay padulngan anang pasiaw nga Binisaya?