Ning bag-ohay lamang, dunay bag-ong komunidad dinhi sa Sugbo nga gimugna alang sa mga mahiligon sa WordPress. Ang pundok gitawag og Cebu WordPress Meetup.
Ang Cebu WordPress Meetup, sa pagsuwat niini, nakamugna na og tulo ka meetup. Ang una kaniadtong Pebrero 28 nga gitawag og #WordPressWednesday: Hello Cebu! ug karong adlawa gipahigayon ang #WordPressWeekend: March Meetup sa A SPACE Cebu.
Mga Bisaya, kon ikaw developer, designer, nagtrabaho gamit ang WordPress ug basta mahiligon sa lamang sa WordPress, pwede kaayo kang motambong sa umaabot pang mga meetup. Imbitado kaayo ka ug ang tanan nimong mga kaila nga mahiligon niining teknolohiya.
Bahin sa Cebu WordPress Meetup
Ang Cebu WordPress Meetup usa ka open community nga libre. Mamahimo kaayo nga moapil niini ug motambong sa umaabot nga mga meetup. Sa pagka karon, ang mga nanagpaluyo sa pundok mao silang Rumejan Barbarona, Michael Brian Tina, Brennan Mercado, ang tagtukod sa Basta Bisaya nga si Rome Nicolas.
Sa umaabot nga mga adlaw, modako kining pundok ilabi na karon nga nangamdan na ang komunidad sa umaabot nga dakong kalihokan nga gitawag og WordCamp nga sa unang higayon ipahigayon dinhi sa atong pinalanggang Sugbo!
Ang Cebu WordPress Meetup ana sa nagkalain-laing luna sa internet:
Ug ania ang mga detalye sa namugnang mga kalihokan ug sa umaabot nga WordCamp Cebu, mga Bisaya:
#WordPressWednesday: Hello Cebu!
Ang #WordPressWednesday: Hello Cebu! nahitabo sa A SPACE Cebu kaniadtong Pebrero 28, Miyerkules. Kini ang unang meetup dinhi sa Sugbo niining maong pundok.
Sulod sa duha ka oras, nagkaabot ang kapin sa 50 ka interesadong miyembro sa Cebu WordPress Meetup ug nagkahisgot sa ilang nagkalain-laing panan-aw ug mga suliran ug solusyon bahin sa WordPress.
Sa labing unang higayon karong tuiga, nagkatapok ang nagkalain-laing mga pundok nga mosalmot ug moabag sa pundok. Nahitabo ang meetup tungod sa pagsalig ug pagbulig sa A SPACE Cebu, Yoast, ug Beaver Builder.
#WordPressWeekend: March Meetup
Ang #WordPressWeekend: March Meetup nahitabo karong adlawa, Marso 24, Sabado diin adunay duha ka meetup nga mimugna: usa alang sa mga blogger ug lain alang sa mga developer.
Gihisgotan ang “Creating A WordPress Website in 30 Minutes” ni Andrew de la Serna nga nagtrabaho sa Automattic ug gikan pa sa Davao. Mianhi siya sa Sugbo alang niining gipahigayon nga meetup. Ang “Creating and Publishing a Plugin in WordPress” ni Dorell James Galang gitambongan sa mga nagkalain-laing developer nga mipaambit sa ilang oras aron sa pagpaminaw ug pag-apil sa diskusyon.
Kining meetup gibuligan sa A SPACE Cebu nga maoy venue sa kalihokan ug sa Yoast nga naghatag og pizza alang sa tanang mingtambong.
WordCamp Cebu
Ang umaabot nga WordCamp Cebu mao ang labing dakong kalihokan nga ipahigayon sa nagkalain-laing dapit sa kalibotan. Sa Pilipinas, dunay namugna nga pila ka higayon nga WordCamp sa Manila. Karong tuiga, adunay ipahigayon sa Iloilo ug dinhi sa atong isla sa Sugbo.
Andam na ba mo sa WordCamp Cebu, mga Bisaya?
