Dako na gyod ang nausab as panahon. Kon sa una halos tanang batan-on nangandoy nga mamahimong artista, karon naa nay bag-ong shortcut aron masikat. Tungod sa teknolohiya, mas dali na lamang masikat ug mahimong artista. Dili na kinahanglan nga moagi sa nipis kaayo nga dagom sa showbiz.
Unsay paagi aron mahimong sikat karong digital na ang kalibotan? Usa sa mga paagi mao ang pag-effort aron mahimong “blaggir” sama nilang David Guison ug Khryz Uy. Dugay-dugay usab usa nila nakab-ot ang ilang mga luna karon sa blogging industry. Ug, kining pagka-blogger, ilabi na mga fashion blogger, nahimong kalingawan sa kadaghanan.
Oo, daghan tang mga amigo ug amiga nga bugal-bugalon. Ug ang social media nahimong luna diin matag picture nga i-post sayon ra kaayo i-like, komentan. Unya mag-una dayon na ang mga comment nga “blaggir” kon mag-post na og mga fashionalista-esque nga picture.
Tanan ba dunay higayon nga mahimong usa ka iladong fashion blogger? Sa tinuoray, dako ang industriya sa blogging karong panahona apan nagbaha ang mga walay klaro, gusto lang masikat. Sa walay pagbinuang, ang fashion blogger alang lamang niadtong kahibawo modala sa ilang kaugalingon, kahibawo mamili og sinina. Mas biased pa gyod kini sa mga gwapo ug gwapa. Ug kanang uban, igo lamang kataw-an sa kadaghanan.
Apan pasagdaan na lang kay iyaha man sad nang lugar sa digital world. Ang social media nasikat kay tanan makatingog, maka-post sa bisan unsa pa man niyang gusto sa kinabuhi. Apan dili tungod kay nalingaw na ka sa imong gipang-post nalingaw na sad ang ubang mga tawo. Apan nganong mag-agad man ta sa ilang isulti? Sa kataposan, dako ang purohan nga kon magmilagro ang kalibotan, masikat siya nga dunay talent, dunay ikabuga.
Apan, angay hibaw-an sa tanan nga dili lamang mga fashion blogger kaning mga “blaggir” natong amigo ug amiga. Ug dili lamang pag-pose ang ilang nahibaw-an kon seryoso na sila sa ilang gibuhat. Ang industriya sa blogging dinhi sa Sugbo nagkadako ug andam gihapon kining modawat niadtong dunay kadasig nga mopadayon ug makapalingaw o dili ba makahatag og dugang kahibawo ngadto sa katawhan.
Ikaw, gusto ba nimong mahimong “blaggir” diha?
