Mga Bisaya, andam na ba mo sa unang Bisaya Music Festival dinhi sa Sugbo?
Karong Septiyembre 16, ipahigayon sa Oakridge Pavilion ang labing unang Bisaya Music Festival! Usa ka adlaw nga puno sa mga musikerong Bisaya gikan sa hapon hangtod na sa tungang gabii. Panahon na nga dunay ingon ani nga music fest nga nagpasigarbo sa talento natong mga Bisaya, di ba?
Ang tumong sa Bisaya Music Festival mao ang pagdasig sa mga batan-ong Bisaya nga suportahan ug higugmaon ang atong kaugalingong musika aron mas daghan pang mga batan-ong Bisaya nga padayon nga magmugna og mga kanta nga misalamin sa atong pagka-Bisaya.
Ania ang 10 ka rason nganong angay kang motambong sa Bisaya Music Festival:
10. Dili kay BISDAK, kondili tungod kay BISAYA DEKALIDAD.
Ang Bisaya Music Festival nagpahinumdom nga ang atong pagka-Bisaya angay natong ipasigarbo ngadto sa tanan! Way duda, usa kini ka adlaw diin Bida ang Tatak Bisaya.
9. Adunay Pop District Bazaar nga bida ang mga produktong Bisaya.
Ang Pop District Bazaar duha ka adlaw nga puno sa nagkalain-laing tinda nga tatak Bisaya. Karong Setiyembre 15-16, Sabado ug Domingo, pwede kaayo kang mag shopping ug mga dekalidad nga produkto ug serbisyong Bisaya.
8. Libre ang mga bata ug senior citizen.
Kon duna moy anak, manghod, pag-umangkon, lolo, ug lola nga ganahan motambong sa labing unang Bisaya Musical Festival, libre na silang tanan. Asa pa ka ana?!
7. Mamahimo kang makadaog og libreng airplane tickets!
Sa imong pagpalit og ticket, mga Bisaya, duna dayon kay raffle nga pwedeng salmotan ug may purohan na kang makadaog og libreng PAL tickets. Kon swerte ka, aw, pawng na silang tanan sa imong kaanyag.
6. Daghang banda ang motukar: Phylum, Wonggoys, Mandaue Nights ug uban pa!
Ang panahon sa Bisrock usa ka henerasyon nga dili gyod malimtan. Nabanhaw ang musikang Binisaya tungod sa mga bag-ong kanta. Ug tungod niini, daghan na usab nga mga banda ang mingsulpot hangtod na sa uwahing mga tuig ug ang pipila nila motukar atol sa labing unang Bisaya Music Festival!
5. Naa sad si Teban ug si Goliat.
Tungod kay ang Bisaya Music Festival nag-ila sa banggiitang mga Bisaya sa nagkalain-laing henerasyon, dili mahimo nga atong labyan ang usa sa labing sikat nga duo nga silang Teban ug Goliat. Busa, naa usab sila niining adlawa aron mopasiaw sa katawhan.
4. Present ang mga payter nga bag-ong Bisaya artists.
Kini ang henerasyon sa Vispop ug sa mga bag-ong kantang Bisaya nga nagpamatuod nga daghang mga Bisaya nga kanta nga bugnaw sa dunggan ug pwede kaayo sa pang-adlaw-adlaw nga musika.
Ubay-ubay ni nga listahan apan kani ang pipila nila: Jerika Teodorico, Lourdes Maglinte, Vincent Eco, Jackie Chang, Medyo Maldito, Malaya Macaraeg, Zhalia, Von Saw, Kurt Fick, ug daghan pa!
3. Naa si Budoy ug ang banda niyang Junior Kilat!
Kon mahiligon ka sa raggae nga Binisaya, siguradong kaila ka ni Budoy Maraviles ug sa bandang Junior Kilat. Sila ang pundok nga nagpabalik sa dungog sa musikang Binisaya ginamit ang reggae nga tukar.
2. Finals Night sa Kanta Kasingkasing.
Atol usab sa Bisaya Music Festial ang labing unang Finals Night sa Kanta Kasingkasing diin bag-ong mga Bisaya love song ang nag-indigay. Adunay lima ka mang-aawit ang magsangka ug mahibaw-an ra usab nato ang mananaog inig human sa gabii.
Mao kini ang 5 ka bag-ong Bisaya love songs nga magsangka sa Kanta Kasingkasing. Ug ang mga finalist mao kini sila, mga Bisaya.
1. Of course, naa gyod na ang Urbandub!
Ug mamahimo ba nga wala ang usa sa labing sikat nga Bisaya nga banda nga ilado sa kaulohan? Busa, atong sugaton sa masipang pakpak, ang Urbandub!
Ug bitaw, ania ang tibuok schedule sa kalingawan ugma, mga Bisaya!
Niining tanan, sulit kaayo ang imong P600 nga ticket, bai. Mag-enjoy na ka sa musikang Bisaya, pwede pa gyod ka nga makabawi sa imong puhunan kon swerte ka karong Domingo.
Unsa man, magkita-kita ta karong Septiyembre 16, ha? Atong suportahan ang atong kaugalingong musika!
