Nindot ni nga pangutana da. Nganong daghan man gyod ang nag-ingon nga basta Bisaya, gwapo ug gwapa na dayon? Ang pangutana: kinsa man ang nag-ingon nga mga gwapo ug gwapa ang mga Bisaya; ang mga Bisaya ra ba usab?
Basta Bisaya, Gwapo ug Gwapa?
Dili ko motuo nga gwapo ug gwapa ang mga Bisaya. Mas motuo pa ko nga isog ang mga Bisaya! Way duda, daghan kaayong isog nga mga Bisaya nga dili magpalupig sa uban dinha. Kaning kagwapo ug gwapa, taphaw ra kaayo. Pero kining isog ang mga Bisaya, bisan dili mga Bisaya motuo gyod ani!
Tinuod dunay mga Bisaya nga mga gwapo ug gwapa. Apan kinsa man say nagbuot kinsa ang maanyag sa ilang mata? Dili ba mag-usab-usab matag henerasyon unsa ang gwapo ug gwapa sa mga mata sa tawo? Tingali tinuod ang giingon nga basta Bisaya, mga gwapo ug gwapa kay wala may moangkon nga batig nawong rong panahona. Apan kon kaisog ang hisgotan, duna gyoy mga tawo nga talawan.
Ang mga Bisaya ilabi na sa Cebu ug Davao dili magpalupig sa uban. Sa tibuok nakong kinabuhi nga pagpuyo sa Cebu, daghan kong kaila nga dili basta magpatunob lang sa uban ilabi na kon ilang pagka-Bisaya ang hisgotan. Ang mga taga-Davao nailhan usab nga mga isog ug dili magpalupig. Tan-awa ra gyod ning mga sinultihan sa Bisaya, pinabundak ang tingog; walay gikahadlokan!
Basta Bisaya, Isog Ug Dili Magpalupig!
Dili tanang Bisaya mga gwapo ug gwapa. Ayaw ko ilara ug ayaw mo pagpailad nga mga basta Bisaya, gwapo ug gwapa na dayon! Pero ayaw gyod ninyo unhi ang mga Bisaya kay basta Bisaya, isog ug dili gyod mosugot nga magpalupig lang!
Kinsay labing isog nga Bisaya? Si Lapulapu, way duda! Wala gyod ni siya mohangop sa pag-abot sa mga Espanyol. Iyang gisuklan ang mga mananakop; iyang napatay si Magellan. Sa pagka karon, pila pa kaha ka Pilipino ang may kaisog sama kang Lapulapu?
Sa bag-ong panahon, duna koy tulo ka pangutana alang ninyo: kinsay labing (1) gwapo, (2) gwapa, ug (3) isog nga Bisaya ang inyong nailhan?
Maghuwat ko sa inyong tubag, mga Bisaya!
