Karong mga panahona, bisan pa gani sa una, dili gyod na magpalupig ang mga Bisaya.

Kon duna kay plano awayon ang mga Bisaya, pagdahom na lang nga awayon ka sa usa ka pundok nga mga isog ug andam gyod hatagan og panahon imong kabuang ug dili ka lung-an.

Bag-ohay lang, nabalita na sad ang pagkaisog sa mga Bisaya dinhi sa social media. Tungod kini sa resulta sa Bar Exam nga migawas karong buwana. Walay mga taga-Manila ang naapil sa Top 10 ug daghan kaayong mga Bisaya ang nalista. Ug duna dayoy mga Tagalog nga misuway og pangaway sa mga Bisaya kay kuno naingon adto ang listahan kay Bisaya ang presidente.

Ug miingon ko sa akong kaugalingon nga dili na ko mag-apil-apil aning ilang gubot nga giapilan.

Sa laing bahin, nakahunahuna sad ko nga motingog apan dili na lang mangaway. Igo na lamang mopaambit og pipila ka pulong nga magpaila natong mga Bisaya.

Aron dali basahon, mao kini ang lima ka butang nga angay natong hinumdoman usa magpataka og yawyaw sa social media karong panahona:

  1. Imbes nga mangaway, hisgotan lamang ang mga butang nga makalambo sa atong kaugalingon ug katilingban.
  2. Dunay mga palaaway nga dili na lamang tagdon apan dunay mga away nga kinahanglang apilan labi na kon gibinuangan na ka.
  3. Hinumdomi nga kon ma-post na na, bisan kapila pa nimo i-delete wala nay pulos kay for sure duna nay naka-screenshot ana ilabi na kon nangdaot na ka sa uban.
  4. Ang mga Bisaya dili gyod na magpalupig ug dili gyod na mosugot nga daog-daogon sa ubang mga Pilipino.
  5. Kitang mga Bisaya kon motubag og mga pangaway dili kinahanglan nga mangdaot sa uban. Mamahimo man nga motingog ta nga dili na motunob sa uban.

Sa kinatibuk-an, akong nakat-onan sa kinabuhi nga walay nada usahay ang mga away nga giapilan. Dunay mga butang nga mamahimo na lamang palabyon. Apan kon duna gyod silay kaisog nga motamay sa mga Bisaya, dakong purohan nga matubag gyod na ilang kabuang nga gisugdan.

Basta mga Bisaya, atong hinumdoman nga dili ta magpalupig apan dili sab ta kinahanglan motamay sa uban sa pagdepensa nato sa atong mga kaubang Bisaya!