Sa imong kinabuhi, kinsang mga anino ang nahimong giya nimo sa matag lakang nga gibuhat? Kon wala ka nakabantay, usa ka mohimo og dakong tunob sa unahan, may mga tawo ka nga pangutan-on o dili ba hunahunaon usa modesisyon. Sila mga anino nga imong sundan aron kon motunob na ka sa unahan dili ka masilag sa kahayag sa adlaw.
Ning bag-ohay lang nag-release ang Kadasig og awit nga “Anino” nga gisuwat ug gikanta ni Jerika Teodorico. Usa kini ka kantang Binisaya nga nagsulti unsay mabati sa usa ka tawo nga nagpabiling anino, nagtan-aw sa iyang sekretong gimahal. Paminawa kining iyang kanta:
Ug sa dihang nagkita mi ni Jerika, imbes nga istoryahan ang iyang kanta, mas mitatak na hinuon sa akong panumdoman ang mga tawo nga hinungdan kinsa siya karon. Sa among paghinabi, dunay lima ka ngalan nga giya sa pagkab-ot niya sa iyang posisyon sa natad sa musikang Bisdak karon. Kanila mapasalamaton siya sa pag-abot sa iyang kinabuhi kay kon wala pa, walay Jerika Teodorico nga naila sa iyang pagdaog sa Vispop 2.0 sa kantang “Labyu Langga.”
Lourdes Maglinte
Klasmeyt si Jerika ug si Lourdes sukad pa sa highschool ug dungan silang nagtubo nga nahigugma sa musika. Matag karon ug unya imbitahon sila nga mokanta ug tungod niini nasuod gyod sila nga managhigala. Tulo sila sa barkada nga hilig og pag-awit apan sila lamang duha ang mipadayon sa natad sa musika.
Ug dihay usa ka higayon nga silang duha nakatambong og songwriting workshop nga mipausab sa ilang kinabuhi.
Jude Gitamondoc
Ug kining songwriting workshop nga gitambongan ni Jerika ug Lourdes gi-facilitate ni Jude Gitamondoc kaniadtong 2010. Sa ilang pagkaila nagpadayon ang plano ni Jude nga magpatukod og usa ka movement nga mopasigarbo sa kantang mga Binisaya. Niining panahona ang Bisrock dili na kaayo ingon ana kasikat. Nagpabilin pa ang Bisrock apan ang hype sa Bisdak nga tigpaminaw dili na sama sa mga tuig sa 2007.
Ug takwahaw lamang nga namugna ang Vispop. Ang plano wala nagpabilin nga plano. Ang mga tunob mimarka ug nasugdan ang Vispop: ang songwriting contest nga nahimo na usab nga genre ilabi sa mga batan-on karon.
Sa unang tuig, wala misalmot si Jerika. Si Lourdes miapil sa kantang “Laylay” nga gi-interpret ni Chai Fonacier ug nakadaog isip ikaduhang ganti.
Gawas kang Jude, ang usa sa mga nagpaluyo sa Vispop nga nadag-an ni Jerika sa ikaduhang tuig sa kantang “Labyu Langga” mao si Insoy Niñal.
Missing Filemon
Alang sa mga wala nakahibawo, si Insoy kabahin sa bandang Missing Filemon. Sila ang nag-una sa henerasyon sa Bisrock. Niining mga tuiga dinha na sa ikaupat nga ang-ang sa elementarya si Jerika. Sa unang higayon dili sad ganahan si Jerika sa Bisrock. Alang sa usa ka bata nga nagdako sa impluwensiya sa Hollywood, ang Bisdak nga kanta alingugngog sa dunggan.
Apan sa paglabay sa mga adlaw, ilabi na dihang nakasugat silang Jude, ang kasingkasing ni Jerika mipasigo na usab sa pagsuwat og kantang Binisaya. Tungod sa impluwensiya sa mga awit sa Missing Filemon nakasuwat siya og pipila ka kantang Binisaya.
Max Surban
Gawas sa Missing Filemon, laing idolo ni Jerika mao si Max Surban. Bisdak nga mang-aawit sa panahon nga wala pa ang Bisrock. Sa iyang henerasyon kauban si Yoyoy Villame, sila ang nahimong idolo sa masa. Sa umaabot may pangandoy si Jerika, sama sa ubang mga mang-aawit karon, nga iyang mga kanta mahimong awit sa katawhan ug siya dili kalimtan sa paglabay sa panahon.
Ang labing paboritong kanta ni Jerika kang Max Surban mao ang “I Love My Teacher” ug ang musika ni Max nahimong giya ug inspirasyon niya sa pagsuwat apan laing templada usab ang gipakita ni Jerika sa iyang mga awit nga gisuwat. Ug tagsa-tagsa ka awit duol sa kaagi sa iyang kinabuhi.
Taylor Swift
Sama kang Taylor Swift nga usa usab ka idolo ni Jerika, ang mga kanta ni Jerika may kahulogan nga mas nindot kon ikaw na lang mismo ang mosabot dinha sa mga linya sa iyang kanta. Sa pagsuwat niini, duna nay tulo ka kanta nga na-produced si Jerika ug kini mao ang “Labyu Langga,” “Baklay” ug “Anino” ug sa dili madugay ilusad na usab ang ikaupat niya nga kanta nga labot sa Vispop 5.0 nga mao ang “Kung Dili Man Gani Kita.”
Ug siguradong magpadayon gihapon og suwat og bag-ong awit si Jerika Teodorico hangtod moabot ang adlaw nga duna nay kugihan nga maintriga unsay kahulogan sa iyang mga kanta. Ug nianang mga higayona, basin dili na siya si Taylor Swift ug andam nang unsay hinungdan nganong nasuwat tong iyang mga kanta.
