Sa Akong Pagtambay sa Vispop 5.0 Screening

Human sa pila ka tuig nga sige nako og paminaw og Vispop, natuman na gyod ang akong pangandoy nga makatambay atol sa usa ka Vispop screening. Kaganiha giimbitar ko ni Sir Jude nga mag-live video streaming ug mo-cover sa ilang pag-screen sa daghan kaayong Bisdak nga kanta alang sa ikalimang hugna sa Vispop.

Tingali naghunahuna si Sir Jude kon ang kanta may kaugmaon ba kaha sa Vispop.

Sa mga nagpadala og kanta, daghan tingali ang na-shocked ganina nganong wala gitiwas ang ilang mga kanta. Ug ang uban natingala hangtod karon nganong wala makaapil ang ilang gisuwat sa Top 6. Apan saksi ko karong adlawa unsay dugoong proseso sa screening committee nga mopili og unom ka kanta nga dili lamang nindot apan dunay kaugmaon sa musikang Bisdak.

Sa tinuoray lang, lain-lain gyod ang pangutok sa lima ka miyembro sa screening committee. Si Jude Gitamondoc ang musical director ug music producer sa Vispop. Siya usab ang nangulo sa Kadasig, usa ka kooperatib alang sa mga Bisaya nga songwriters nga nagsuwat og Binisaya. Ang iyang mga paboritong kanta kadtong dunay magic kon madunggan na sa katawhan.  Si Zarah Smith usa ka entrepreneur luyo sa Handuraw Pizza. Siya usab ang singer/songwriter luyo sa bandang Zarah. Sa akong nabantayan, hilig niya ang kanta nga catchy ug daling masakyan sa mga maminaw. Ikatulo si Insoy Ninal luyo sa bandang Missing Filemon ug social media rockstar Sinugbang Sugbo. Isip Project Manager sa Vispop, ang iyang mga gipangpili kadtong mga kanta nga bag-o ug sa iyang tan-aw mohatag og bag-ong dungog sa Vispop.  Sunod nga sakop mao si Atty. Jojo Lopez, ang tag-iya sa Pitstop Restaurant. Nagtukar siya sa keyboard sa usa ka local band ug abogado usab. Isip labing hingkod sa grupo, lain-lain gyod nga tingog ang ilang girepresentahan. Kataposang miyembro si Joseph Gara mao ang ang nakadaog sa Vispop 4.0 ug nahimo nang rule sa Vispop nga ang ikalimang sakop mao ang Grand Prize winner sa miaging tuig. Ug karong tuiga, siya ra usab ang exempted nga moapil sa tanang mga nakaapil sa miaging mga tuig sa Vispop. Kon inyong nabantayan, ubay-ubay ang misuway og balik ug karong tuiga dunay usa nga nakalusot.

Matag usa nila dunay usa ka vote alang sa pagpili sa Top 6. Dakong purohan nga kon lain pa ang mga screeners karong tuiga, laing mga kanta atong madunggan unya. Apan salig ko nga ang ilang mga gipili mosalamin sa mga kaanindot sa pagpanulat og kanta natong mga Bisaya karong panahona.

Si Insoy ug Atty. Jojo seryoso sa pagsabot sa lyrics ug unsay padulngan sa kanta nga ilang gipaminaw.

Isip tambay sa Vispop screening, naghunahuna sad ko nganong dili tiwason ang kanta. Para inyong masabtan, let’s do some Math. Dunay 324 ka kanta nga gi-submit rong tuiga. If average length sa usa ka kanta 3 minutes, kinahanglan ta og kapin 16 ka oras aron madunggan tanan. Ang screening ganina nagsugod og alas 9:30 sa buntag ug natapos og screen ang tanang kanta alang sa Round 1 alas kwatro sa hapon. Nag-working lunch ang team maong bilib gyod ko sa tanan kay walay kakapoy nga maminaw og kanta. Kon gi-play pa ang tanan, kadlawn na mi nahuman sa Round 1 pa lang.

Sa laing bahin, sakto si Hope Tinambacan sa iyang gi-comment sa livestreaming video. Kabantay ba mo nga ang istilo sa pagpaminaw sa mga kanta sama ra nato nga maminaw og kanta sa radyo. Kon dili ta ganahan, balhin estasyon. Kon maminaw og music sa headphones, pila ba kanta ang atong gi-skip kay wala ta ganahi maminaw?

Dili gyod maagwanta og paminaw ang tibuok kanta kay sa tinuoray lang, kon bati na ang sugod, wala na gyod nay future sa Vispop. Usahay, makaluy-an kon nindot ang Chorus apan daghan ang wala nakasabot unsay gamit sa Chorus. (Kani, tun-i ni unsay gamit sa Chorus tingali makatabang nimo sunod tuig.)

Kapila na man intawon gibalik-balik ni Sir Jude unsay mga tips nga angay nga mahibaw-an sa tanang mosalmot sa Vispop. Apan ang pangutana, naminaw ug nibasa ba kaha ang mga nisubmit ani nga mga tips? Base sa among nadunggan, usa ka matag pito ka nisubmit og kanta lamang ang naminaw. Sa tanang mga wala nadawat, basaha ninyo og balik ang mga tips nga gi-post ni Sir Jude kay mao na ang criteria sa contest. (Dili na jud ni secret apan gamay lamang ang nakasabot. Padayon ta ug sa sunod tuig bag-ong kanta na ang i-submit nga dili lang char-char. Palihog lang!)

Sila si Joseph Gara ug Zarah Smith nanghinuklog sa mga kanta nga ilang gipadayon ngadto sa sunod round.

Karong tuiga, daghan ang bag-o. Usa lamang ang gikan sa nangaging Vispop apan wala gyod na-mention ang iyang ngalan atol sa deliberation. Ug sa tinuoray lang, ang kanta ug title lamang ang basehan. Walay ngalan sa tagsuwat ug kinsay gakanta. Ug walay higayon nga makaingon ka nga ipadayon kini siya nga kanta sa sunod round kay si kuan ang nagkanta niini. Kon mahibaw-an sa screener ang ngalan, iyaha na na. Wala gi-influence nila ang ilang mga kauban kinsa ang nagkanta ug ipadayon ang usa ka kanta kay si kuan ang nagkanta. Kon bati ang kanta, aw, sunod na sad. Kon nindot, aw, nindot gyod na regardless kinsa ang nagkanta.

Vispop 5.0 Entries Sneek Peek

Sa akong pagtambay sa Vispop screening, naluoy ko sa mga mo-screen sa mga kanta. Dili sayon ang ilang trabaho nga mopili sa bag-ong hugna sa mga kanta nga karon giatngan na sa katawhan. Nindot unta kon ang mga mopadala og kanta dili lang basta mo-submit apan gihunahunaan gyod unsa ang ilang gipadala. Kinahanglan ka og bag-o nga ideya ug maayo nga recording. Dili kinahanglan mogasto apan ayaw mo pagpadala og yabag o dili ba hugaw nga recording kay sakit sa dunggan. Naghatag mo og rason nila nga mo-reject sa inyong paningkamot.

Nakakita ba mo sa livestreaming sa Vispop screening ganina? Bisan dili tibuok screening sa Round 1 ang naapil, at least kahibawo na mo unsay proseso sa Round 1. Ayaw mo pagdahom nga i-play ang tibuok kanta. Kutob ra gyod na sa Chorus kon hiuyonan kay kon wala na gyoy paglaom, pila pa lamang ka linya putlon na imong kanta. Ayaw mo kaguol kay mas guol hunahaon nga paminawon imong tibuok kanta nga wala katunga sa quality sa imong kontra. Tungod kay contest man, the best gyod na imong i-submit. Less conyo kon ganahan gyod mo masulod unless naa gyoy point ang imong pagka-conyo. (Yes, mahinungdanon ni siya nga tip, higala.)

Ang Round 2 gi-livestreaming usab ganina. Wala naapil ang duha man tingali ka kanta sa sinugdanan apan gitiwas na ang the rest of the songs. Dinha ninyo mahibaw-an nga nilang lima ka screeners, nag-voting sila kinsay mopadayon sa sunod nga round. Giihap pila ka yes ug pila ka no. Mahibaw-an dinha kinsay naapil sa Round 3 ug Round 4.

Vispop 5.0 Finalists

Ug sa human sa tanang lalis ug paghashas sa laing hugna sa Bisdak nga kanta, ania na ang Vispop 5.0 Top 6 nga angay natong atngan ang lyric video karong Hunyo.

  • Hulagway – music by Dexter Latosa (Cagayan de Oro) and lyrics by Ma. Rhodora Veloso (Misamis Oriental)
  • Kung Di Man Gani Kita – music and lyrics by Jerika Teodorico (Cebu City)
  • Kung Di Pa Lang Ko Buang – music and lyrics by Chai Fonacier (Cebu City)
  • Kurog Ko – music and lyrics by Jeremy Sarmiento (Davao City)
  • Siya Ra Taw’n Ang Nahigugma – music and lyrics by Jane Abaday and Winset Jacot (Cagayan de Oro City)
  • Unsa Ning Tamaa – music and lyrics by RJ Ensalada (Cebu City)

PS – Kon ganahan mo makadungog og sample, check out the livestreaming video above. Padayon, Bisaya! 

Tagged as: , , , ,

Author: Rome Nicolas

Magsusulat sa Binisaya. Garbo iyang pagka-Bisaya. Hilig og kaon. Laagan. Motto: support local. Padayon!

11 thoughts on “Sa Akong Pagtambay sa Vispop 5.0 Screening”

  1. Feeling nako maboang ko kung makadungog ko ug ingon ana kadaghanang kanta in a short span of time. Hahaha pero nindot ni nga experience da.

  2. I grow up listening to bisaya songs nilang Maxsurban ug Yoyo Villame (not sure kos spelling sa ilang name). Mao na perme pamusic ni papa katung bata pa ko. Malingaw kaau ko maminaw hehe kay naay sagol humor.
    Congrats Rome kay nahuman ra jud nimo after 48 years. Hinaot wala ra ka nasum-uran hehe. Yes to bisaya songs!

  3. Ang screening ani kay murag sa writing contest sad. If bati ang intro or start sa article kay ilabay na dayon ang papel ug di na tiwason ug basa. Ana gyud ang kamatuoran. Dapat catchy ang first few lines pa lang para naay chance. Congrats sa mga finalists. Congrats pud sa mga judges and people behind Vispop kay kugihan kaayo sila.

  4. Ganahan kaayo ko maka witness ug in-ani. Naa koy ig-agaw nga singer tig kantahan ug vispop sad before then maminaw rako nila ineg finals na haha. Feel nako murag kapoy ning screening. haha

  5. Ang kahago ug ang dedication jud sa mga nag compose sa kanta ko ni bilib. Dili sya sayon apan dili man jud tanan ang maka sulod. But then again naa raman jud japoy laing chance. Can’t wait to hear the songs na!

Leave a Reply

Your email address will not be published. Required fields are marked *