Alang sa mga Bisayang Single Karong Valentine’s Day

Ngano diay ni sila: kinahanglan ba gyod nga ang Buwan sa Kasingkasing alang niadtong mga dunay uyab, dunay bana, dunay asawa, ug dunay hinigugma? Dili ba diay pwede nga ihatag ta ning buwana niadtong mga single apan nahigugma sa ilang kaugalingon?

Ayaw mo og tuo anang giingon nila nga Valentine’s Day alang lamang sa mga dunay relasyon. Sauna diha toy proposal nga usbon ang ngalan sa Valentine’s Day ngadto sa Single Awareness Day (SAD). Ambot kaha kon unsa nay update aning kalakiha.

Kon inyong hunahunaon ang Valentine’s Day dili lamang usa ka adlaw. Usa gyod kini ka buwan sa nagkalain-laing mga panghitabo sa tibuok kalibotan. Dinhi sa atong dakbayan sa Sugbo, mga Bisaya, nagkalain-lain usab ang mga kalihokan. Halos tanan gihalad niadtong mga duna nay kaunay sa kinabuhi.

Apan, ang pangutana nga nagtangag og dakong ganti, unsay angay buhaton kon single ka karong Buwan sa Kasingkasing? Base sa akong pagpangutingkay, ania ang 10 ka butang nga pwede nimong buhaton:

 

1. Magtuon kon estudyante. Mag-focus sa trabaho aron happy ang boss.

Ang nakanindot rong panahona kon single ka dili ka maproblema sa kwarta. Walay kinahanglan hunahunaon nga surprise. Libre imong tanang adlaw sa bisan unsa pa mang laag.

Dili samok imong kinabuhi. Maka-focus ka sa imong pagtuon. Kinahanglan nindot ang grado ha? Samtang nagtrabaho, wala kay atimanon nga selpon aron replayan. Dili ka kapoyan og tag sa mga lingaw nga pikyur sa Facebook niadtong kagwang nga wala sa imong kinabuhi. Walay samok!

 

2. Manawag sa mga higala aron dili mag-inusara karong buwana.

Kon single ka, ayaw gyod hunahunaa nga nag-inusara ka. Duna kay mga higala nga single pod diha. Kon taken na gani silang tanan, like sila jud nga tanan (grabe na man sad!), kinahanglan na nimong mangita og bag-ong mga amigo ug amiga. Di na maayo da.

 

3. Magsige og katawa sa ‘A Funny Valentine’ nga concert.

Gusto kang motan-aw nilang Pokwang, Pooh, K Brosas, ug Chokoleit nga mogitik sa imong kasingkasing diha sa stage? Duna silay show dinhi sa Sugbo, bai! Welcome dinhi ilabi na ang mga Bisdak nga single!

Karong Feb 11, duna silay show sa Hoops Dome, Lapulapu City sa alas 7:30 sa gabii. Karong Feb 12, sa Marco Polo Plaza Hotel, Cebu City na usab ang ilang concert sa alas 6:30 sa gabii.

Pwede ra gyod ka mag-solo og tan-aw pero basin ganahan sad ka manginvite sa imong mga higala ug mag #squadgoals ta ninyo. Ayaw na anang #relationshipgoals kay magbuwag ra lagi na sila.

 

4. Moapil og basabalak sa ‘Balak sa Gugma, Gugma sa Balak’ sa Plaza Independencia.

Kon nagmaoy man gani ka o gusto lang maminaw og mga balak, mangadto ta sa Plaza Independencia sa Valentine’s Day. Sa Pebrero 14, kita ang mag-date. Welcome kaayo ang tanang single niining poetry night nga halad sa mga gugma nga nawala, naabot ug umaabot pa lamang. Kini ang gabii nga kitang mga batan-ong Bisaya magtapok, magsaw-anay og balak, mangita og future sa kilid-kilid basin pa diay!

 

5. Mag-organize og outing with friends. Pananglitan, sa mga tagong waterfalls sa Sugbo.

Sa mga weekend karong Pebrero, mamahimo usab nga manlaag mo sa imong mga higala. Daghan kaayong tago nga waterfalls nga dili samok dinhi sa Sugbo. Dihay usa ka Sabado kuyog nako akong mga higala ug nangadto mi sa Kabutongan Falls ug Montaneza Spring sa Malabuyoc, dayon nilahos mi sa Cankalanog Falls sa Alegria. Sulit kaayo nga pwede sad ninyo ning buhaton uban sa imong mga amigo ug amiga.

Kon wala kay friends nga willing molaag, maghimo kaha ta og grupo dinhi sa Facebook no? Unsay inyong tan-aw, bai?

 

6. Magmaoy sa ‘I’m Drunk, I Love You’ nga salida.

Nangita ba ka og hugot nga salida karong Valentine’s Day? Showing na sa Pebrero 15 (sweldo na!) ang I’m Drunk, I Love You nilang Paulo Avelino ug Maja Salvador. Bahin kining salidaha sa bespren nga ang usa nainlab na diay sa iyang higala.

Warning: ayaw og hilak samtang nagtan-aw aning salidaha. In case lang, pagdala og panyo, bai. Mas maayo na nga prepared.

7. Maminaw og Binisaya nga kanta nga dedicated sa mga single ug gipaasa.

Ang kantang ‘Padayon’ nga labing unang dalit sa Kadasig bahin sa pag-move niadtong mibiya na sa imong kinabuhi. ‘Hahahahasula’, ‘Pero Atik Lang’ ug ‘In Love Ra Kutob’ tulo usab ka laing mga Binisayang kanta nga bahin aning one-sided nga gugma.

Daghan pang Vispop ug Bisrock nga kanta dinha nga pwede nimong kalingawan og paminawn. Ayaw lang palabi basin dili na kaya sa imong kasingkasing. Aw, kon duna pa kay heart o basin gikupog na niya.

8. Ipang-unfriend ang mga sige og post anang ilang #relationshipgoals.

Or, pwede ra sad imong i-unfollow aron dili kaayo harsh.

Samok anang sige og pasuya sa ilang mga lovelife ipanawng gyod nimo nga single ka! Dili na maayo. Hinumdomi lang nga 99% sa mga relasyon ron magbuwag ra na puhon. Grabe na man sad apil sila sa 1% bai. Unsa sila, germs?

9. Magpakabata sa ‘You’re a Good Man, Charlie Brown’ nga musical.

Karong buwana, ato na gyong masaksihan ang musical play nga ‘You’re A Good Man, Charlie Brown’ dinhi sa Sugbo diin ang mga actor mga Bisaya! Pwede kaayo ni nimong tan-awn nga mag-inusara o kuyog imong mga higala. Bitara lang gud sila nga nagdako sa henerasyon sa Peanuts nga comics.

Bibo kaayo ang ilang mga kanta ug in all fairness recommended kaayo ang acting ug tingog dihang nag-sample show bag-ohay lang. Kon bored ka karong February 17-19, mangadto ta sa SM City Cebu aron manan-aw aning musical play nga dili lamang alang sa mga bata, apan sa mga may kasingkasing nga iya sa bata. Welcome kaayo dinhi ang tibuok pamilya.

Kitakits dinhi, mga Bisaya! Kon ganahan ka og kuyog, ingna lang ko. Pwede ra kaayo ka mouban namo.

 

10. Matulog sa tibuok buwan sa Pebrero. Mangita og pizza. Walay magbuot.

Siyempre, skip this month with a good night sleep. Inig human sa trabaho o kon walay buhaton, makig-bestfriend sa kama. Hagok ug pagdamgo nga moabot na tawon ang nadugay og abot. Dili lalim maghuwat, kahibawo ko ana. If naay kwarta, palit og pizza. You know… pizza is love, pizza is life!

Ikaw, unsay plano nimo rong Pebrero, bai? Naa ba kay laag diha nga recommended sa mga single karong Valentine’s?

Tagged as: , , ,

Author: Rome Nicolas

Magsusulat sa Binisaya. Garbo iyang pagka-Bisaya. Hilig og kaon. Laagan. Motto: support local. Padayon!

15 thoughts on “Alang sa mga Bisayang Single Karong Valentine’s Day”

  1. I think it’s nice to celebrate Valentine’s Day but usahay ma sensationalize ra sad. Hahaha. Naa sad ubang tao na himuon gyud big deal ang Vday. Lol. I just slept for the entire day para di nami maka add pa sa traffic sa metro.

  2. Ahahaha.. ahaka sa mga tambag uy. Nakatawa kos 99% ug 1%.
    Pero di lang ko mang unfriend ug mang unfollow, kay di man ko bitter. Hugotero lang ko, pero actually di ko bitter. dili, dili, dili.. LOL

Leave a Reply

Your email address will not be published. Required fields are marked *