Salamat sa Higayon, Handuraw Gorordo!

Human sa pila ka tuig nga pagpuwaw, matulog na gyod ang Handuraw Gorordo. Ang suking abtanan sa mga hilig og  pizza, tagay, banda, kanta, basabalak ug bisan pa trivia manirado na karong Hunyo 15, 2017.

Oo, dili lang kan-anan og pizza ang Handuraw. Bisan ilado kini sa iyang thin-crust pizza, ang ngalan nga Handuraw nahimong katumanan sa daghang mga damgo. Dinhi nahanduraw sa nagkalain-laing mga tawo ang ilang mga pangandoy ug natuman usab kini dinhing lugara.

Kahibawo ba mo nga dinhi nagsugod ang TINTA, ang organisasyon sa UP Cebu nga nagpasiugda og balik sa basabalak human kini nawala sa pipila ka tuig? Matag buwan na nga may basabalak diin gipasigarbo ang mga Bisayang balak dinhi sa atong kaugalingong nataran.

Ug kining lugara saksi usab sa pag-indayog sa musika dinhi sa Sugbo. Dinhi nagsugod ang Bisrock nga nahimong payong nga mipasilong sa Missing Filemon. Ug sa samang lawak mipahigayon ang Vispop sa unang screening. Layo na gyod ang naabtan sa Handuraw Gorordo nga daw sama nag kahulogan nga Bisdak nga kultura.

Sa pagkakaron, daghan nang branches ang Handuraw. Dunay sa JY Square, White Gold ug Mango Square. Ug bisan pa man sa nagkadaghang branches niini, lisod gyod ilubong sa kalimot ang branch sa dalan sa Gorordo sa Lahug. Kinsa bay magdahom nga kining lugara mahimo na unyang mga condominium ug hotel pipila ka tuig gikan karon? Panahon na gyod tingali sa kausaban nga dugay nang gihuwat sa uban, apan gikahadlokan sa gagmayng mga mamumuo.

Ang Handuraw Gorordo nahimong laagan namo niadtong tinun-an pa lang ko sa UP Cebu ug sa paglabay sa panahon kauban na sa ginagmayng kalihokan aron sa pag-ugmad sa kaugalingong katitikan. Sa Sugbo, ang Handuraw usa sa labing unang mga cafe dinhi nga mihangop sa nagkalain-laing artist ug mihatag og luna aron madunggan ang ilang tingog.

Sa pagkatulog na unya sa Handuraw Gorordo, daghan ang moagi niining dapita nga maaninag gihapon ang kagahapon diin may maglanog-lanog ang mikropono samtang natagbaw og hurot sa beer nga giparesan og pizza.

Tagged as: , ,

Author: Rome Nicolas

Magsusulat sa Binisaya. Garbo iyang pagka-Bisaya. Hilig og kaon. Laagan. Motto: support local. Padayon!

Leave a Reply

Your email address will not be published. Required fields are marked *