Bisaya Movie: Kadtong Ungo sa Adventure ni Lily

Ug nakakita na gyod ko sa award-winning Binisayang lilas (film) sa Cinema One sa “Lily” sa dihang naabot siya sa Sugbo gabii, Marso 31. Kataposang adlaw sa buwan sa Kababayen-an ug sakto usab nga mitan-aw kog usa ka salida nga nagpasigarbo sa pagkakabaye nga Bisaya.

Ang salidang “Lily” nalakip sa Best Filipino Films of 2016 sa Rappler. Matod pa ni Oggs Cruz, “Inspired by a Cebuano legend that parents use to scare children to go to sleep, the film expands on the household fiction, turning it into a document on flawed masculinity, of men and their fear of commitment.” Sakto gyod, daghang mga isyu nga subtle kaayo pagkalamas sa salidang tatak Bisdak!

Si Keith Deligero (direktor) nakamugna og usa ka lilas nga nagtahi-tahi sa daghang mga sugilanon bahin sa ungo nga si Lily. Taga Tuburan, Sugbo nga nakabana, namabdos ug gibiyaan. May mga higayon nga mahimo siyang iring ug mopatay og mga motamak sa iyang pagka babaye. Way duda, biktima sagad mga lalaki nga wala makaila og respeto.

Dihang nahibaw-an nako nga ipasalida dinhi sa Sugbo ang “Lily” gikan sa akong maestra nga si Ligaya Rabago (nga usa sa mga cast niining salidaha), wala ko magduha-duha og tan-aw. Sa tinuoray, nag-expect ko og hadlok nga salida apan ang akong nakit-an usa ka salida nga dili lamang ngilngig pamation samtang nagtan-aw apan dunay mga butang kong nakat-onan paghuman og tan-aw.

Way duda, kining salidaha usa sa mga labing maayong mugnang salida sa Binisaya nga angay nga ipasigarbo natong mga Bisaya.

Apan sa tinuoray lang daghan ungo aning salidaha. Apan sa pagmugna sa lilas pa lang, mangtas ang mga ungo nga gisagubang sa production. Dili barato ang pagmugna og salida ug mas lisod pa gyod ko ron ang proseso labi na kon dunay mga hayop nga apil sa imong salida. Unya kon nahuman na og mugna ang salida, dili na usab sayon kombensihon ang mga manan-aw nga hatagan og chance ang usa ka gamayng salida nga ilang tan-awon ug dili lang kutob sa minilyon ang budget nga Hollywood movies.

Sa miaging Cinema One, kini ang salida nga nakadaog sa Best Actor (Rocky Salumbides), Best Supporting Actress (Natileigh Sitoy), Best Director (Keith Deligero), ug Best Editing. Di ka malain ana, upat ka awards gikilaw niining Bisaya nga salida?!

Ug kon dunay higayon nga mag-screening og balik ang Lily dinhi sa Sugbo ug dinha sa inyong lugar, ayaw ninyo sipyata og tan-aw. Dili mo magmahay niining salidaha nga sure ko wala pa gyod ninyo makit-i ang style sa iyang pagkagama. Sa sinugdanan daghan mo og pangutana nganong naingon ani, naingon ana apan sa pagpadayon na sa salida, matubag ra inyong mga pangutana.

Ug alang sa mga wala pa kita, ania diay ang official trailer sa “Lily” nga unta malingaw mo:

 

About Rome Nicolas

Magsusulat sa Binisaya. Garbo iyang pagka-Bisaya. Hilig og kaon. Laagan. Tatak Bisaya. Padayon!

View all posts by Rome Nicolas →

10 Comments on “Bisaya Movie: Kadtong Ungo sa Adventure ni Lily”

  1. Naigking ug nahadlok bya ko gyud ko while nag tanaw hahaa!

    Nindot nag storya! Matinud anon na problema, kalipay, kasakit ug labaw sa tanan GUGMA!

    Sauna pa gyud nis Lily nakahadlok nako teenager pako wa pa gani ko kita ug bisan sa salida nahadlok gyud ko niya! pero naa na koy pagbati sa pagsabot bisan hadlok ko niya.

    Naigo ug nabuhi ni Best director akoang pagbati sa ko saunang gibati ni Lily!

    KUDOS LILY 2016!

  2. Trailer pa lang daan naka-ingon na jud ko nga complicated ni nga istorya. Dili lang kay pure nga ungo2x. Sayang lang kay wala sad ko nakahigayon ug tan-aw sa special screening niya sa SM Seaside.

  3. Sayang wala ko nikuyog pero makaproud gyud ang ilang gibuhat. Hinaut pa unta maenganyo ang mga bata na maghimo pag mga maanindot na sine ug dili lang puro joke joke sa Youtube.

  4. Nindut jud siguro ni kay grabi ang awards ug reviews! Nindut pagka-buhat sa trailer kay galibug ko sa sturya, murag kataw-anan pero hadlok man sya sama sa imong ingon na dghang mga ungo.

  5. Usa gyud nis pinaka-refreshing na mga salida na akong nakit-an in recent memory. Samot na kung Filipino movies atong storyaan. Dili gyud siya kung typical na ungo2 lang nga salidaa, it goes beyond that gyud. Komplikado gyud siya, mura og tinuod nga kinabuhi, wa lay labot ang ungo2 na aspect, or apil gyud ba? Hahaha

Leave a Reply to WanderingFeetPH Cancel reply

Your email address will not be published. Required fields are marked *