Level Up Gyod Ang Vispop 5.0, Mga Bisaya!

Atol sa screening sa Vispop 5.0, nabantayan nako nga daghan na ang nausab sa mga kantang gipang-submit sa Vispop. Dunay uban nga sundon ang format sa mingdaog sa miaging tuig apan dili kini ang formula aron ma-Champion. Ang bugtong formula mao ang mopadala kag entry nga bag-o ug makapahimuot sa katawhan.

Ning bag-ohay lang, nahuman na gyod ang proseso sa paglimpyo, pagpanindot ug pagbuhat og lyric video sa mga kanta nga gihuwat sa tanan. Mga Bisaya, ania na ang unom ka kantang Binisaya nga atong kalingawan og paminaw karong tuiga:

 

Hulagway

Music and lyrics by Dexter Latosa and Bingbing C Veloso
Performed by Bingbing Veloso of Karumata Repablik

Sa akong pagpaminaw ani, mahinumdom ko sa Bintana Coffee House and Restaurant sa Mango ug La La Land nga salida. Dili daghan ang mga Bisaya nga nagsuwat og jazz ug ang kahigayonan nga makadungog og sama niini makapahimuot sa dughan.

 

Kung Di Man Gani Kita

Music and lyrics by Jerika Teodorico
Performed by Davelyn Cuenco

Ang sinuwatan ni Jerika iya sa hingkod nang magtatagik og awit. May dulot sa dughan unya ang version niiining kantaha ni Davelyn nahimong usa ka daw Adele nga kanta. Makapahiyom.

 

Kung Di Pa Lang Ko Buang

Music and lyrics by Chai Fonacier
Performed by Chai Fonacier

Payter ning kantaha ni Chai! Daw bugal-bugal apan dunay unod. Sakit sa dughan ug matag pahiyom dulot sa kasingkasing daw pana nga miigo. Usa ka balak alang sa mga batan-on nga nabuang na sa kinabuhi dinhi sa dakbayan.

 

Kurog Ko

Music and lyrics by Jeremy Sarmiento
Performed by Jetz Tacsanan of Zhalia

Birit ang gahom aning kantaha. Daling sakyan kon madunggan ug way duda nga mosikat kini sa mga batan-on, ilabi na sa mga babaye nga dunay gikaibgan. Ug naghuwat lamang sa kagwang.

 

Siya Ra Taw’n Ang Nahigugma

Music and lyrics by Winset Jacot and Jane Abaday
Performed by Winset Jacot and Jane Abaday

Sa una, daghan kag pangutana. Maayo pagkahimo ang lyric video kay pintok kini sa liriko sa kanta. Sakit sa dughan, tingali makapatulo sa imong luha. Ilabi na sa mga batan-on nga makasakay sa sugilanon sa awit.

 

Unsa Ning Tamaa

Music and lyrics by RJ Ensalada
Performed by Refrain

Igo ang mga batan-on, ilabi na mga lalaki nga dunay gikaibgan. Banda usab ang nag-interpret maong daling mahimong jamming session sa mga bayong. Way duda, ang liriko niini magbalik-balik sa imong dunggan.

 

Kinsa kaha ang modaog kining mga kantaha sa umaabot nga Vispop 5.0 Finals Night karong Hulyo 29, 2017 sa SM Seaside City Cebu? Atangi, mga Bisaya!

About Rome Nicolas

Magsusulat sa Binisaya. Garbo iyang pagka-Bisaya. Hilig og kaon. Laagan. Tatak Bisaya. Padayon!

View all posts by Rome Nicolas →

2 Comments on “Level Up Gyod Ang Vispop 5.0, Mga Bisaya!”

  1. Ganahan ko’g jazz mao instant ganahan ko sa Hulagway pero no. 1 gyud para nako ang Kung Di Man Gani Kita. Ganahan kaayo kos pagka arrange sa music. Hehe

Leave a Reply

Your email address will not be published. Required fields are marked *