Laag sa Tops Skyline Garden sa Busay, Cebu City

Kapila na ka nakadungog aning giingon nilang Tops sa Cebu? Dinhi kuno makita ang tibuok Sugbo ug nindot mag-date-date diri sa uyab kay tugnaw ilabi na kon gabii. Hala, medyo overrated na gyod ning Tops Skyline Garden sa Busay, Cebu City apan maglisod gihapon og ari ang mga walay sakyanan kay lisod kaayo mangita og sakyanan.

Ning bag-ohay lang, nibisita na sad ko sa Tops uban ang akong mga higala. Hapon kadto ug gabii na mi nakaabot. Tugnaw ang hangin, nindot mag-chill uban ang mga tawo nga gusto nimong kauban unya naa ra say tindahan nga pwede palitan og pagkaon kon gutomon, ilimnon kon uhawon.

 

Unsa ang Tops Skyline Garden?

Ang Tops Skyline Garden usa ka destinasyon nga sagad adtoan kon naa ka sa Sugbo. Nahimutang kini sa Busay, sa bukirang bahin sa dakbayan sa Sugbo. Gikan sa 2,000 feet nga bukid, imong makita ang tibuok Sugbo ug Mandaue ug apil na ang isla sa Lapulapu. May bahin usab sa Bohol nga imong makita ilabi na kon adlawan. Mga suga na lamang nga magpindok-pindok imong makita sa kagabhion ug kini makalingaw usab sa imong mata.

Tugnaw ang lugar. Ilabi kon panahon sa Disyembre, magkurog ka kon walay jacket. No wonder nganong daghan ang mag-date-date diri aron dunay rason nga dapat close mo sa imong kuyog.

Sa Trip Advisor, kini ang ikatulo nga labing nindot nga adtoan sa dakbayan sa Sugbo. Nindot mag-picture-picture dinhi. Pwede sad nga motambay lang kauban ang barkada o mga minahal sa kinabuhi. Bukas kini 24 ka oras sa usa ka adlaw, 365 ka adlaw sa usa ka tuig.

Mga Kalingawan sa Tops sa Busay, Cebu

Dihang nangadto mi og Tops, nagpahatod mi sa Go To Tops nga van service. Wala nay hasol unsaon pag-adto, fixed pa ang rates dili parehas sa taxi, o motor nga depende lang sa sabot.

Daw nisimhot ra hinuon mi sa Tops kay wala mi dangti og usa ka oras apan kon nagdugay pa mi, dili lang picture taking among giadto.

Ang among ticket dinhang nangadto mi apil na ang drinks. Tungod niini, nangita mi og pwede mainom sa mga tindahan sa Tops. Dunay lima ka cafe/restaurant nga imong kapilian. Naka-decide mi nga mag-Royal (ambot unsay nasulod sa utok) apan duna say choice sa beer kon gusto nimong manginit.

Lingaw adtoan ang Tops kuyog ang uyab. Kon single, pwede ra gyod kauban ang barkada. Mag-picture taking dayon na sa sinugdanan (required baya) unya inig taudtaod pwede na mangaon ug mag-inom. Walay corkage so payter kaayo!

Adunay P100 nga entrance apan swerte kaayo mi kay apil na siya sa Go To Tops package. Wala ra mi gigasto sa among kalingawan. Sa sunod, ikaw na sad unya adto sa Tops. Malingaw ka sa view especially if naa kay nindot nga camera.

 

Unsay Sakyan Paingon sa Tops?

Aron makaadto sa Tops Skyline Garden sa Busay, Cebu City, pwede kaayo nga mogamit sa imong kaugalingon sakay (kon duna), taxi ba ron, o magsakay ka og motor. Dili fixed rate ang pletehan dinhi ug nagdepende gyod sa inyong sabot sa driver. Mao ni ang usa sa mga problema kon moadto kag Tops, lisod ang sakyanan. Sagad, P200 hangtod na sa P300 ang plete sa usa ka tawo paingon didto apan pwede pa nga mas momahal especially if makabantay sila nga maka-afford ka.

Apan dunay solusyon ana! Ang Go To Tops nga among gisakyan dihang mibisita mi sa Tops Skyline Garden usa ka van nga mohatod ug mokuha nimo sa Tops sa Busay. Usa kini ka 14-seater shuttle van nga pwede rang ma-contact online o mag-on-the-spot lang ka og huwat nila sa El Taquito Mexican Resto dinha dapit sa JY Square (duol sa Dessert Factory).

Fixed ang ilang rate ug naay mga designated nga oras sa paghatod ug pagkuha ninyo. Tan-awa ang poster sa ubos alang sa detalye:

Ug mao na siya, mga higala, ang adventure namo paingon sa Tops bag-ohay lang. Sulit kaayo ug dili na gyod siya problema unsaon pagpaingon didto. Sa P300 lang, apil na niana ang drinks nga pwede juice, softdrinks o beer ba kaha. Ug kon hilig ka og massage, mahimo na siyang P370 unya ang imong massage woth P150 na. Sulit kaayo!

Nakaadto na ba mo og Tops Skyline Garden? Unsa pa kahay kalingawan dinhing lugara no?

(mga hulagway kuha sa Go To Tops ug ni Rea sa Blissful Snapshots)

Tagged as: , , , ,

Author: Rome Nicolas

Magsusulat sa Binisaya. Garbo iyang pagka-Bisaya. Hilig og kaon. Laagan. Motto: support local. Padayon!

10 thoughts on “Laag sa Tops Skyline Garden sa Busay, Cebu City”

  1. Taod-taod napod ko nakabantay ani nila na service, ug nalipay ko tungod kay naa nay ingon ani. Di na gyud kinahanglan mag-lisud lisud sa mga habal-habal. Hehehe.

Leave a Reply

Your email address will not be published. Required fields are marked *