Tungod sa Free Facebook, Dili na Kamao Mo-Google

Unang naabot natong mga Bisaya ang Google. Usa pa ang Facebook, diha toy Friendster. Sa pagkamatay sa Friendster, abi nato og mohinay ang social media. Mas nidaghan na hinuon ang mga mogamit sa social media tungod sa Free Facebook. Lupigan ang Twitter ug Google+ (nga nagtinga na intawn).

Karon nga daghan na kaayong mga Pilipino ang may Facebook account, paspas na kaayong moabot ang impormasyon. Kon usa danghan og pila ka semana ang telegrama ug suwat, karon instant na ang pag-send og message dinha sa Facebook. Ang internet dako gyod ang nausab sa atong kinabuhi.

Ang eleksyon sa tuig 2016 usa ka social media election. Kon walay social media, siguradong dili makadaog ang kasamtangang presidente karon.

Mao kini ang maayong balita: nakapadaog ang Free Facebook sa usa ka tawo nga nangandoy sa labing taas nga posisyon sa atong nasod.

Sa laing bahin, mao kini ang dili maayong balita: tungod sa Free Facebook, paspas nga mipakatap ang mga bakak ug inimbentong mga balita ngadto sa naglain-laing mga Pilipino bisan asa pa mang bahina sa kalibotan.

Ang nahitabo kaniadtong Mayo sa Pilipinas nausab sa Amerika ning Nobiyembre. Ang ilang presidente nakadaog usab tungod sa labihan nga paggamit sa social media. Ang iya usab nga mga supporter naghimo og mga inimbentong balita aron ingnon nga maayong tawo ang ilang kandidato.

Kon wala pa lay social media, kinsa man ang tuohan sa mga tawo? Ang traditional media sama sa TV, newspaper ug radyo? Sa giingon pa nila, biased kuno kining traditional media sa unsay gusto nilang ipakita ug ipahibawo sa katawhan.

Apan maayo ba kaha nga ang social media gamiton sa mga politiko sa dili maayong binuhatan? Wala may problema nga hatagan nato og higayon ang matag tawo nga motingog matinuod man o dili. Ang atong problema kay kon ang mga social networking sites sama sa Facebook walay buhaton aron mahibaw-an tinuod ba o bakak ang mga gipang-share nga balita sa katawhan.

Sa laing bahin, lisod ba gyod i-Google kon tinuod ba ang usa ka balita? Unta maghimo sad og Free Google aron kining mga tawo nga hilig mag-Facebook makat-on usab og research. Dali ra ang pag-share og article dinha sa Facebook apan unta maghatag sila og higayon aron i-verify unsa katinuod ang ka-share.

Unsay pulos kon magsige na lang ta og pamakak ug buhat-buhat og balita aron ingnon maayo? Asa man kaha ta padulong aning atong kinabuhi kon magsige na lang ta og ilad sa atong kaugalingon?

Kon ako pa lang ang makabuot, dili gyod ko mosugot nga ang mga troll accounts hatagan og samang pagtagad aning mga legitimate accounts nga dugay nang gibuhat ug nagpuyo nga matarong dinha sa social media.

Unsa kahay sunod nga lakang sa Facebook ug Google aron mopatigbabaw gihapon ang katarong ug kaayohan? Magpadayon ba kaha ang ang mga bakak ug inimbentong istorya sa ilang mga binuhatan?

Atangi ang sunod nga kabanata niining atong istorya.

About Rome Nicolas

Magsusulat sa Binisaya. Garbo iyang pagka-Bisaya. Hilig og kaon. Laagan. Tatak Bisaya. Padayon!

View all posts by Rome Nicolas →

5 Comments on “Tungod sa Free Facebook, Dili na Kamao Mo-Google”

  1. sa tanang butang, naa gyud maayo ug naa puy naka apan. Sa social media, kusog gyud ang FB labi nas Pilipinas. mas daghan ug reached. Mao say naka apan sa ato-a mga bloggers guro. Daghan mu like sa FB pero sa views sa blog – nga nga kay free data ra. T_T

    1. hahaha katawaa nako sa comment ni Rady. bitaw ay. Untag naa say free data para sa atong mga blogs para sad sila mu-view pud. hehehe.

      Adunay mga pros and cons and social media ug kita dli makapugong ana. Ang mga kompanya nagpalabihay na sila ug promo kay makaginansya pud na sila. Mao nang naay free fb. Hnaot unta na puhon, m-apply ang social media etiquette para pud sa ikalambo sa atong nasod. char.

      1. Kon pwede pa lang libre na lang ang internet, mas nindot gyod ta. Para mas daghan ang mobasa, dili na magsalig sa FB lamang. (Char, mag-award na gyod ko ani sa mga pinaka effort nga comments!)

  2. Grabe jud ning Facebook oy. Di jud sila kahibalo kung unsaon ning mga bakak nga balita. Pirmi ra jud nila ipasa sa lain. Apilon pa ang mga mugamit! Pwede ang Facebook juy musulbad ana? Samok na kaayo! Zzz

Leave a Reply

Your email address will not be published. Required fields are marked *