Alang sa mga Bisayang Dili Na Kamao Mag-Binisaya

Sa panahon karon, gamay na lang ang mga batan-ong Bisaya nga kamao mag-Binisaya. Sa panahon halos matag madunggan ug makit-an Iningles, nganong mogamit pa man og lunsayng Binisaya sa pag-istorya? Sa tinud-anay lang, mao sad kini ang pangutana nako sa akong kaugalingon.

Ug usahay makaingon ko nga nagpakauwaw ra man ko aning pagka-Basta Bisaya nga dili man ko sagad mag-Binisaya matag karon ug unya. Ilabi na kon makigtabi sa higala. Apan, kon hagiton nga mag-Binisaya, walay suliran. Kaya kaayo na!

Bisan tuod dili na ko pirme mag-Binisaya kon makig-istorya, dunay mga higayon nga mas lami gihapon nga mogamit sa atong inahang dila. Pananglitan, kon tig-basahan mo sa akong Facebook, halos matag karon ug unya mag-Binisaya. Nahimo na ni nakong normal nga inadlaw-adlawng kabuang dinha sa internet.

Matag semana, may bag-o kong Binisaya nga sinuwat. Hilig ko maminaw og mga Binisayang kanta kon magtrabaho sa opisina, maglingkod tibuok adlaw mag-atubang sa kompyuter. Ug kapila na sad ko maka-attend og mga Vispop gig sa Handuraw matag karon ug unya.

Ning semanaha lang, mitambong na sad kog Gabii sa Vispop sa Handuraw Pizza Mango. Dinhi, mikanta silang Jerika Teodorico, Lourdes Maglinte ug Johnever Canlom. Mga anak sa Vispop. Mga batan-on. Mga Bisaya. Nag-Binisaya sa ilang mga kanta. Dili hadlok mag-Binisaya. Apan, sama nako, dili sa tanang panahon mag-Binisaya sa ilang tinabian.

Tingali dili sa tanang higayon kinahanglan na natong mag-Binisaya. Kon makig-ist0rya kag mga tawo nga naglisod o dili kamao mag-Binisaya, mapugos ka nga m0-adjust. Usahay mag-Iningles ka. Mamahimo sad nga Tinagalog. Bisan asa lang.

Alang nako, ang mga batan-on dili angay nga malimot sa atong pinulongan. Apan, lami sad hunahunaon nga sa mga batan-on karon, ubay-ubay sad diay tang mga wala pa nalimot sa atong inahang dila ug naggamit niini matag karon ug unya dinha sa nagkalain-laing agi. Mamahimong sa blog. Pwede sad sa tinabian. O dili ba sa mga awit nga gisuwat. O mga salidang gimugna.

Daghang paagi aron mapadayon ngadto sa unahan ang atong kaugalingong pinulongan. Padayon, mga Bisaya!

Tagged as:

Author: Rome Nicolas

Magsusulat sa Binisaya. Garbo iyang pagka-Bisaya. Hilig og kaon. Laagan. Motto: support local. Padayon!

Leave a Reply

Your email address will not be published. Required fields are marked *