P1,000 Travel Challenge: Trip to Malabuyoc-Alegria, Cebu

Hilig ba mo og laag-laag pero gamay lang ang budget? Kon duna kay usa ka libo ka pesos, asa kaha kutob ang imong maadtoan, mga Bisaya? Kami sa akong mga higala nga sila si Rea, Sean ug Hanna mga laagan. Kani si Hanna nagpasiugda ni siya og kabuang nga maglaag-laag kuno mi unya ang among bawon P1,000 lang gyod.

Ug sa una namong laag, daghan gyod unta mi. Wala lang nitunga ang uban. Maayo ra sad kay daghan unta ang masuko nako kay imbes nga alas kwatro nga nahimong alas singko among sabot sa South Bus Terminal, alas 6:30 na ko naabot kay minus singko para alas sayis nako nakamata.

Ang among tipid trip goal: Malabuyoc ug Alegria, Cebu. Mangadto mi og mga waterfalls nga dili kaayo adtoan sa mga tawo. Sa Iningles pa, we’re chasing waterfalls. Aron mas char, budget-friendly chasing waterfall adventure.

 

Kabutongan Falls sa Malabuyoc, Cebu

Tungod kay hapit na alas siyete mi nakagikan, naabot mi sa Malabuyoc alas diyes kapin na usab. Naswertehan mi kay among nakasakay sa bus nga among gisakyan nga Ceres kahibawo asa dapita ang eskina sa Kabutongan Falls sa Barangay Looc, Malabuyoc, Cebu.

Kon wala ka kahibawo, pwede ra kaayo nga monaog ka sa Poblacion, Malabuyoc ug mosakay og motor paingon sa Kabutongan Falls ug mobayad ka og P75 (pero wala mi kasuway ani, salamat sa Ginoo).

Sa Kabutongan Falls, pwede kaayo mag-canyoneering. Duna siyay upat ka level apan tungod kay nag-uwan niadtong nangadto mi, ang Level 1 ug Level 2 lang ang pwede paadtoan. Sa Level 1 pwede ra ka dili mabasa ug nindot kaayo dinhi pang-pictorial, mga bes. Ang paingon sa Level 2 mabasa gyod ka. Pag-amping lang nga di mo madakin-as kay maparehas gyod mo nako nga mabasa og ahat nga dili pa ready.

Sa among pagbaktas gikan sa eskina Looc paingon na gyod sa Kabutongan Falls, kuyog namo ang tour guide nga si Kuya Joel. Lingaw kaayo siya ug bibo kaistorya. Kon moadto mo, segurado ko nga may moduol ra gyod ninyo nga mag-tour guide aron dili mo masaag.

Montaneza Spring sa Malabuyoc, Cebu

 

Paghuman sa Kabutongan Falls, tungod kay udto na man, naniudto mi sa Poblacion kuyog ang among tour guide. Paghuman, giubanan mi ni Kuya Joel paingon sa sunod namong destinasyon, ang Montaneza. Nalingaw lang sad mi sa among gibuhat tungod kay duna mi nakaistorya samtang nagbiyahe nga lumad nga taga-Malabuyoc.

Sa Montaneza, dunay hot spring ug 7 ka level sa waterfalls nga wala namo matiwas tungod kay nagdali. Misuway mi og tuslod sa among mga tiil sa 42.6 degrees nga hot spring apan nakabati ko nga napaso na ang akong tiil maong wala dangti og usa ka minutos ang akong pagtuslod ug namuwa na akong tiil.

Mga upat ka level sa waterfalls among naadtoan ug wala na mi nipadayon tungod sa kadaghan. Wala sad mi kahibawo niadtong panahona nga kutob ni pito ug sa kinaibabwan naa didto ang Montaneza Falls. Abi namo og spring lang unya ginagmayng falls.

Pwede kaayo dinhi mag-canyoneering alang niadtong mga adventure seeker. Ang hot spring alang niadtong mga gustong makarelaks sa init nga tubig. Maayo ra sad kay ang uban hot spring dinhi dili ra kaayo init sama niadtong among gisuwayan nga labihan ka init.

 

Cankalanog Falls sa Alegria, Cebu

Sa among pagbiya sa Malabuyoc, ang kataposan namong adtoan tungod kay wala mi oras mao ang Cankalanog Falls sa Alegria, Cebu. Kapin usa ka oras nga biyahe sa motor ang among biyahe paingon dinhi. Inig naog sa motor, duna pay kapin baynte minutos nga paglakaw. Dili lalim, mga bes.

Ug sa among pag-abot na sa Cankalanog Falls, in all fairness, nindot kaayo. Ang iyang tubig bughaw nga limpyo kaayo. Kon hilig kag adventure, pwede kaayo maglukso-lukso. Ingni lang daan ang inyong motor nga kinahanglan mog life vest kon dili mo kahibawo molangoy aron dad-on mo sa eskina nga makaabang mo og life vest. Walay life vest sa lugar mismo, naa ra kuno sa eskina. Medyo gidemalas mi kay wala miagi sa eskina ang motor nga among giagian ug kutob na lang mi picture kay walay nilukso namong upat. Duna man god mi kauban nga wala nilukso ug wala sad gyoy niuna og suway. Sayang, no?

Human sa kapin usa ka oras nga pagligo sa gamayng waterfalls, nahuman mi sa among tabi-tabi. Nanguli mi ug kapin alas 6 na mi naabot sa eskina nga among gisakyan sa Ceres. Namalit mi og pan og misakay og Ceres.

Naabot mi balik sa dakbayan hapit na alas diyes sa gabii. Ug pag-abot sa balay, natulog na diretso kay gikapoy sa biyahe.

 

Tipid Travel Expenses

Successful ba mi sa among P1,000 Travel Challenge? Ania ang breakdown sa among gasto niadtong among trip:

P81 – plete taxi gikan sa amo paingon sa terminal (kay late na kaayo ko nakamata)
P172 – plete sa Ceres bus paingon sa Malabuyoc, Cebu
P50 – bayad namo sa tour guide (P200 in total)
P42 – gasto sa akong lunch
P20 – entrance sa Kabutongan Falls
P35 – plete gikan sa Looc paingon sa Montaneza
P20 – entrance sa Montaneza Spring
P35 – plete gikan sa Montaneza paingon sa Alegria
P300 – plete paingon Cankalanog Falls (two-way)
P30 – entrance sa Cankalanog Falls
P22 – bread isip dinner
P150 – plete sa Ceres paingon sa Cebu City
P40 – plete sa taxi paingon sa Lahug

Total: P997 (hala, hapit gyod ko mahutdi og kwarta da)

Ug mao to mga bes ang among unang P1,000 Travel Challenge. Asa kaha ang sunod? Atangi!

About Rome Nicolas

Magsusulat sa Binisaya. Garbo iyang pagka-Bisaya. Hilig og kaon. Laagan. Tatak Bisaya. Padayon!

View all posts by Rome Nicolas →

16 Comments on “P1,000 Travel Challenge: Trip to Malabuyoc-Alegria, Cebu”

  1. Suya kaayo ko aning byahea. Ganahan gyud unta kaayo ko mokuyog apan naa may gagmayng kakulian sa balay gud nga kinahanglan unahon. Hinaot nga makakuyog ko sa sunod ninyo nga byahe

  2. Omg hahahah tres nalang gyud mulapas nakas budget! But wa man jud nilapas so keri on. “Mabasa na di pa ready” haha!!! Till next time nasad mga laagan!

  3. Kuyog na ko sunod aning laroy laroy nga ang gasto dili dapat mo lapas ug usa ka libo. Nindut gyud ni siya nga laag. Daghan ang maadtuan pero gamay ra ug gasto. Nindut gyud ni sa mga travel bloggers, daghan gyud ma post. Puhon kaluy-an sa kawanangan, maayog lawas maka kuyog ra unya ko ninyo. Padayon Bisaya. πŸ™‚

  4. Arang2x nang inyong viahe sa motor kay usa ra ka oras. Hahaha! Katong nag waterfalls mi sa akong ig-agaw, Mga 3 ka oras mi viaje one way pa lang og na-sun burn mi. Lesson learned. Mag-auto ta uy! Hahahahahahaha! In fairness, puede ra i-bus ang Cebu kung walay lain.

  5. Ang Mainit spring ug Montaneza falls sa Malabuyoc pa akong nabisita ani nilang tanan. Maynta puhon makakuyog kog mga ingon ani na laag. Kay isa ka ko sa mga taw nga gusto mulaag pero dapat gamay rag gasto.

Leave a Reply

Your email address will not be published. Required fields are marked *