Cebu Content Creators Convention: Padayon, Mga Bisaya!

Komosta na kaha ang mga Bisaya nga content creators karon?

Sa miaging Cebu Content Creators Convention nga nahitabo sa Parkmall kaniadtong Hunyo 6, Martes, nakahigayon ko nga mopaambit sa akong kahibawo ngadto sa mga bag-ong subol nga content creators dinhi sa Sugbo. Dinhay mga blogger, vlogger, Youtuber ug Instagrammer. Sa panahon karon lain-lain na ang klase sa mga tighimo og lingaw nga content dinha sa wanang sa internet. Dili na lamang mga blogger. Bisan gani ang blogger usahay pangayoan pa man og mga social media posts. Hihi. To be inclusive about it, content creators na lang ang tawag!

 

Mga Panghitabo sa Cebu Content Creators Convention

Atol sa kalihokan, nakahigayon mi sa pagdapit sa Youtuber nga si Jomie Hospital nga bag-0 lang nagpuyo dinhi sa Sugbo. Iyang gihisgotan ang mga tip unsaon pagpa-viral sa usa ka video. Gawas kang Jomie, mitabi usab si Rea Alducente sa Blissful Snapshots. Iyang giistoryahan mao ang mga paagi unsaon pagsugod sa blog. Sunod nga mitabi si Wellbein Borja sa Pergazine ug iyang gihisgotan unsay buhaton ug unsay makuha kon maka-publish ka sa imong gisuwat sulod sa 24 ka oras. Si Philip Mayol sa Cebu Finest mipaambit usab og mga tip unsaon pag-connect sa imong blog/vlog ngadto sa mga brand. Sa iyang bahin, si Lex Tablante sa Sirus Gaming mipaambit sa iyang sugilanon giunsa niya pag-partner sa nagkalain-laing mga gaming brands ug nganong naimbitar sa mga internasyonal nga kalihokan. Si Hanna Frejoles sa Bean in Transit misaysay usab unsay nakalisod sa usa ka professional nga travel blogger.

Ug wala usab ko napauwahi. Akong gihisgotan naunsa na ang mga Bisaya nga content creators dinhi sa Sugbo ug sa tibuok Visayas-Mindanao. Dinhi akong gisaysay nga ang mga tighimo og vlog sama ni Jomie Hospital nasikat tungod sa iyang paggamit sa Binisaya nga pinulongan, ug daghan na usab ang tigsuwat og kanta gamit ang atong kaugalingong lengguwahe. Bisan gani sa mga tighimo og lilas (movie) daghan na man ang nag-Binisaya. Unya, nganong gamay ra man ang nagsuwat og Binisaya nga blog? Bitaw, unsa diay problema kon maggamit ta og Binisaya sa atong gihimo? Kaya ra man mag-translate ba.

Sa kataposan, ang pagka-tatak Bisaya dili lamang kutob sa pinulongan. Bisan maglisod ta og gamit og Binisaya, mamahimo man gihapon natong suportahan ang mga lokal nga Bisaya nga naghatag og garbo sa atong banay.

 

Apil sa Cebu Content Creators

Kon interesado ka moapil sa mga pundok nga Cebu Content Creators, bisitaha lamang ang among website. Pwede sad ka moduol nako aron matambagan tika kon angay nga sunod nimong buhaton. Ang Cebu Content Creators bukas sa mga Bisaya ug naa sa Sugbo nga mga content creators. Sila kining mga blogger, vlogger, Instagrammer, o Youtube. Bisan unsa pa man ka nga klase sa digital content creator, pwede kaayo kang moapil sa among pundok!

Padayon, mga Bisaya!

About Rome Nicolas

Magsusulat sa Binisaya. Garbo iyang pagka-Bisaya. Hilig og kaon. Laagan. Tatak Bisaya. Padayon!

View all posts by Rome Nicolas →

Leave a Reply

Your email address will not be published. Required fields are marked *